【情侶拍拖秘地】穿梭橫街窄巷間 找最好行的街、最好坐的公園
有邊個未試過係IKEA拍拖？連電影《500days of summer》中Summer和Tom亦有此一幕。但大概只有在香港才會看見示範區全部梳化被坐滿的情景，情侶成為示範單位中的風景，他們也在想像自己未來的「理想的家」。
我們都想有一個浪漫又有情調的地方談情說愛，但現實環境不容許，戀人們又是如何在城市間尋覓、建造他們的秘密基地？
IKEA：沙田果間樓底高
「我們通常是去不同的示範單位，想像如果一齊住會點佈置，研究下第時梳化買布面定皮面，行到累就坐係梳化傾計。」23歲的Kasi如是說。街邊人多，加上男友夏天大汗不想在街「乾蒸」，為了找個不用消費的室內地方「拖下手仔傾密偈」，他們逛光全港的Ikea。
但原來逛Ikea都有攻略，首先，要夜晚去，「少啲人，特別係少啲大陸人。」
還有，不能去得太頻密，大概兩個月一次。「因為要等佢轉display，不然會好悶。」
咁邊間最好行？「沙田那間樓底高、通道闊，行落舒服，還有Ikea餐廳可以吃飯。九龍灣（那間）都大，但位置有點偏僻，但拍拖都不錯。」
無止境步行：太子行到九龍塘，寧靜之選
香港的年輕情侶腳骨力應居全球之冠。早前有報道指出，香港街道上座椅不足，反而防止人們坐下的「機關」卻很多（石壆後面設有放置小石，或者特意把花槽旁的壆位做得特別窄）。即使設有座椅，仍很難坐得舒服——面向沙塵滾滾的大馬路，以及長凳中間「阻住晒」的扶手。
於是要在城市中消磨時間，就離不開步行，不斷地步行。
「我們通常下晝去紅磡食下午茶，然後去寶石戲院睇戲，因為平，睇完去行街或者機鋪，食完晚飯再行去黃埔，然後行去尖東。係咁行嚟行去，其實超級攰。」Elle以前住中大宿舍，男友在理工大學讀書，二人活動範圍離不開紅磡尖東一帶。但路邊可以坐的地方不多，唯有一直行。
「佢溝我果時，係旺角睇完午夜場, 之後係旺角泉章居對面馬路啲長櫈度飲酒吹水，但嗰啲凳好唔舒服，會坐到大脾有個網嘅印，但無計啦，鬼叫佢溝我， 我又受溝咩，sosad。」
如果是在九龍，只是想食完飯散散步，可沿彌敦道從旺角走到尖沙咀，以尖沙咀海傍為終點。 若嫌彌敦道太多人與車，可以選擇行九龍塘豪宅區。從太子出發，往旺角大球場方向行，沿大馬路往九龍塘方向直走，走到律倫街還有個隱蔽的小球場可以坐下來休息，是九龍區步行的寧靜之選。
港島呢，基本上午夜一時電車停駛後，沿住電車路任你行，非常舒服，灣仔、銅鑼灣到北角，沿著英皇道黃燈照耀甚有氣氛，還會不時途經 24小時麥當奴，可以去廁所。
公園：沙田城門河有「包廂」？
說到不用付費的消遣地點，公園怎能不上榜？但在公園談情更需要有攻略。
「沙田城門河畔不錯，沿路都有櫈，仲有包廂。」住沙田的阿粉說。
包廂？
原來是指「分得好開」的長椅，上面還有簷蓬，「幾有自己空間咁。」
根據非正式統計，受情侶歡迎的公園還有：觀塘海濱、鰂魚涌海濱、添馬公園，和尖沙咀海傍。似乎在海邊有陣陣涼風吹送，仍是首選。
商場：MEGABOX有好長嘅錫錫電梯
商場in general 是不上榜的，除了MEGABOX。Megabox是不少情侶一致認同可以拍拖的地點。
「有得睇戲又有得溜冰，仲可以行IKEA。」Elle說。最緊要，還是有IKEA。
還有，「重點是，有條好長嘅電梯可以錫錫。」