【地盤人語・墨斗篇】十指龜裂　為愛女硬撐　阿B：我要做墨斗王

27歲墨斗工「阿B」為養育兩名年幼女兒，甘願踏上一條日曬雨淋的工作路，忍受繩索纏手錐心之痛，飽嚐工地沙塵滾滾、泥漿醃眼之苦。生活迫人，常要加班返夜的阿B，時刻惦記家中幼女，「好想衝返屋企錫佢地，但唔得！要咬緊牙關捱過。」在工地打拼的他，現正為自己的人生彈出一條亮麗的墨斗線，希望兩年內升任墨斗王，增加收入，彌補因工作而忽略了的家庭，如水平尺般拿揑平衡點，「希望每日都能夠平安返去錫佢地。」

回憶初入行　十指痛歸心

會考零分的「阿B」，畢業後在職場打滾7年，曾從事銷售及運輸工作，但嫌薪酬微薄，兩年前在朋友介紹下，投身地盤工作。

阿B形容，在地盤當新人的歲月，人生黑如墨斗。「因為係做𡃁，我揸住線頭，墨斗王收線收得緊，扯到手指就嚟斷，啲線箍到手指充晒血，真係十指痛歸心。」他雖戴了兩對手套，但線又幼又韌，手指仍呈龜裂及長繭。倘遇着苛刻的判頭，返工更如墮地獄，悲慘如黑市勞工。

石屎未乾透　泥漿彈入眼

阿B指出，在地盤工作，最惡劣的情況莫過於在下雨天遇着剛落完石屎及要開「夜線」（即晚上八時至凌晨一時），「擸住個垃圾袋就行出去」。假如石屎未乾透，石屎泥漿彈入眼，「好剌眼，啲皮膚又敏感。」

鐵枝插腿湧血　工頭抬出地盤外不報勞工處

但這些磨練仍不及一次工傷之痛。某日臨收工，他返家湊女心切，跑往辦公室取水鏡，要跨過10條獨木橋，豈料踩至第9條時意外跌倒，右小腿撞落鐵枝，當場皮開肉綻，見骨流血。當時經理見狀「嚇到抽晒筋」，只把他抬至地盤門口再送院治理。判頭事後並未報告予勞工處，僅稱會給予五分四人工，「點知休息到第20日，佢就催我返工。」背負家計的阿b惟有啞忍，腫着腳，一拐一拐返回工作崗位。「地盤面頭睇落好好，但好多嘢都係私底下解決的。」

你哋（女兒）瞓先，爹地賺錢你哋先有好的生活，可以一齊去玩波波池。

開「夜線」掛念家中女兒

為趕工期，阿B常要開「夜線」。在漆黑的工地裡，阿B手持平水尺，在投射燈的照射下，他瞇着眼望着尺上郁動的水珠，隱約看見家中稚女珠玉般的面孔。他歸心似箭，卻要留守工地。「囡囡打電話嚟，問幾時放工返屋企，叫快返嚟食飯，留咗飯畀你，我愛你。」阿B心想，為了數百元日薪，犧牲了陪伴女兒成長的時間，「我都係選擇去拼搏，叫囡囡『你哋瞓先，爹地賺錢你哋先有好的生活，可以一齊去玩波波池。』」 

希望每日都能夠平安返去錫佢地。

最緊要都係一家人開開心心、齊齊整整，落公園玩吓都已經好開心。

小時家庭關係欠佳　更珍惜父女感情

阿B愛護家庭，或多或少，跟自己成長經歷有關，他的父母年齡相差甚遠、隔膜大，常為錢吵架，曾因家暴入院，小時候「冇一日開心」。因此，他20來歲已結婚，育有兩名分別5歲及3歲的女兒。「唔想佢哋行返我舊時的路，雖然我都嚴厲，但我冇打過佢哋。」去年父親節，女兒畫了幅畫送給他，四口子一起食晚餐，「最緊要都係一家人開開心心、齊齊整整，落公園玩吓都已經好開心。」

但再努力維繫，鐵漢也有遺憾，談及枕邊人，阿B不諱言二人關係漸漸疏離，疑因女兒及工作關係，妻子感到受束縛。「好似墨斗線咁，拉得越緊，條線彈得唔靚，要識得鬆……太緊會令到身邊的人窒息，抖唔到氣。」阿B揚言：「好多謝老婆的付出，我真係好愛佢。」

白紙一張變「大𡃁」　日薪倍增

阿B尤記得，他入行時如一張白紙，緊跟着師傅東奔西走，年半過後因機緣際遇，走至人生轉捩點，在北角地盤升任「大𡃁」，負責三幢樓的工作，日薪由500元跳升至1,100元。「由地下起第一層，做到37樓，每一條墨線你都自己彈出嚟，起磚牆、裝修，每一個工序睇到晒，去到入伙，覺得呢幢樓我都有份起，有少少虛榮感，阿女經過見到都會好榮幸。」

報考大工試　立志兩年內做「墨斗王」

「墨斗(界)有句格言：『做得快就錯X晒！』」令阿B領略到做人做事要循序漸進。現時他理清人生目標，就是兩年內成為墨斗王，「到時起碼日薪千六七。」他邊做邊學，「得閒拎個板嚟跟圖則彈下。」今年10月會報考大工試，希望加操順利通過。

「爸爸你返工要小心啲呀，落雨要帶遮遮呀！」

近日家中傳來喜訊，大女成功入讀第一志願的小學，作為爸爸倍感開心，懂事的女兒窩心地說：「爸爸你返工要小心啲呀，落雨要帶遮遮呀！」阿B均會爽朗地應道：「係，爸爸放工返嚟，即刻帶你出去食飯、去玩！」