【地盤人語・有片】墨斗做啲乜？　勾勒施工界限　對圖計數都要識

墨斗工是地盤工地重要的一員，他們會根據圖則，以工具「一比一」準繩地在工地刻劃或彈上墨色或藍色線，好讓工友能依照方位來建築。據了解，現時本港有數萬名墨斗工，當中不乏女性加入。於去年，有一名外貌像演員楊冪的「墨斗之花」，曾紅爆網絡。

工程師的左右手

有人戲指：「唔做中（中間人）、唔做保（擔保人），唔做墨斗三代好。」但兩年前，自嘲算數不精的阿B經朋友介紹下，決定轉行做墨斗，才知悉數學的重要。他由零學起，$550日薪，慢慢升至今日的$1,100日薪，一路走來並不容易，亦要「睇天做人」。好天時，可直接使用墨斗彈線；微雨時，則可在頭尾打釘，再拉魚絲線；最苛刻的莫過於「紅黑雨」時，要使用長水尺放在地面，一條一條線地用筆劃。阿B認為墨斗工易學難精，在地盤內是工程師的左右手，又要向工作環境內的人員落指令，細心和歷練相當重要。

夕陽無限好，只係有啲攰，但當你攰的時候，你諗起錢，你唔會攰喇！

老行尊：要識拆圖，對方位有感覺

做了廿年墨斗的老行尊葉奇君指出，地盤內墨斗工人數是紮鐵工的三分之一，而女墨斗工只佔2%，「20來歲都見過，多數都係屋企人介紹先會做。」晉升方面，葉奇君認為不難，「我見過有人兩年就做到師傅（墨斗王），要識拆圖，對方位有感覺，對圖例敏感， 專注啲就得。」葉奇君指出，現時行內因考量成本，令墨斗工工作量大增，但認為只要勤力，「過咗個關口就得，先儲好能力。」

至於他們賴以為生的搵食工具墨斗，相傳是中國土木工匠祖師魯班先師所發明。據說魯班因看見母親以粉末袋和線來在布料上印線，遂靈機一觸，以斗內貯墨，線繩穿過墨穴後染黑，末端扣以一個小木鉤（又稱「班母」），方便垂直彈線。隨着時代和技術的進步，現時墨斗工均使用便攜式的墨斗，拉線就彈得。