【逆權司機．來稿影評】睇完想大嗌「公平咩？呢個世界公平咩？」
文：陳藍
記得宋康昊於電影初段有段他對女兒說的對白，大約意思指：
阿囡， 你一定要學識忍耐，因為呢個世界根本無公平㗎﹗
跟住的兩小時劇情，就是睇住宋康昊，如何推翻自己講過的這句說話——靠小人物力量，對抗不公之事。
韓國總統文在寅更親自入場睇戲，又話要徹查當年光洲事件。至於香港，特首又夠唔夠膽入場睇《十年》、《亂世備忘》呢？ 真係想學許文彪講返句：
公平咩，呢個世界公平咩？
【編按：以下內容或含劇透，逃生門在此。】
的士司機有好多種，有拒載、有拎鐵棍趕客、有車箱畀你點歌的， 不過戲中的宋康昊以上皆非，他演個市井到不得了的司機大佬，護送報道光洲血腥鎮壓的德國記者。一幕幕鎮壓場面，再加睇住宋康昊由市井司機變身民主抗爭英雄，香港觀眾怎會不聯想到 28 年前廣場發生的事，不過記得還記得，近幾年經歷咁多風雨，即使觀眾睇起嚟百般感受，但可能更多的是無奈，甚或嘲笑主角戇居。講到底，香港人從來都不相信小人物有力量。
近年社會氣氛愈來愈差，抗爭情緒自從雨傘運動後一蹶不振，入場睇過的香港觀眾，大抵愈睇愈矛盾，一方面羡慕韓國有氣量拍出自家暗黑歷史電影，另一方面覺得電影劇情，放回現今香港簡直是天方夜譚，不過觀眾賞畢後有反思，電影已經功德無量，話時話，過多三十年，香港仲播唔播得呢套戲呢吓？
戲中感受最深一幕，是宋康昊私下逃走，去到跟光洲一山之隔的城鎮，當地居民睇畢新聞後道聽途說，話係學生先搞事，軍隊才出動鎮壓，每個人的咀臉，說話的口吻，就似平日在茶餐廳，那些看住電視新聞，指罵搞社運的人一樣，場面幾咁熟悉。
網上見不少觀後感，說要邀請支持建制的市民去睇，其實大家係咪唔記得，香港一早有《十年》、黃之鋒紀錄片《未夠秤》等，電影公司若果邀請林鄭欣賞，睇怕佢都即時耍手擰頭拒絕入場。韓國近年多套電影都拍回自己暗黑歷史，加上《逆》片在當地票房大賣，更成功令政府開檔案徹查光洲事件，比起其他亞洲大國韓國確是更有氣度，活在香港的人除了只有羡慕，都只能嘆句「公平咩？」
不過以戲論戲，同樣是宋康昊做主角，同樣以光洲事件做背景，筆者覺得《逆權大狀》更加出色。《逆權司機》劇本較為戲劇性，尤其尾段公路的士大戰，略嫌煽情，也許跟導演只能單憑德國記者多年後撰寫的日記，及零星目擊者的口供去創作故事，自然比起《逆權大狀》少了份真實感，不過又正正電影的戲劇感，令《逆權司機》的迴響來得更大。
（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）