【奧運火炬手】大台，又係荷蘭叻喎！
現役運動員要備戰比賽我明，咪搵班退役嘅、或者無得參賽嘅去囉；退一步講，或者因為廣告合約呀代言費呀時間緊迫呀…諸如此類，你無得揀運動員，咁，咪揀個形象真係好，真係夠奧運代表性嘅知名人士囉，why 阿叻先？大台外事部回應係：陳百祥具有代表性，大家不應該質疑他的資格。好，陳百祥有咩代表性？
隨住連日自殺式爆發，「爛扣」真係爛到連個扣都見唔到，行家吹水，大家都好坦白話，除咗等時間過，畀市場「消化」個消息之外，出咩花招都只係淋火水，何況宜家品牌仲被一位女士「被代言」，當李詩韻用完都變李偲……嗯，真係殺手級宣傳。
講到「被代言」，香港人呢幾日又無端端被代言咗。里約熱內盧奧運會的聖火傳送火炬手之中，藝人陳百祥獨佔香港代表一席。點解可以咁？原來又係大台發威，因為佢有里約熱內盧奧運的香港獨家轉播權，所以可以由佢哋派一位代表到當地傳聖火。
所以話，有錢就是任性，唔怪得中國外長都可以咁大口氣，用幾多李施德林都無用。（啊～佢哋應該扺制咗，難怪。）
明星藝人皆曾任火炬手 問題是今次是「單一代言」
公道講，傳聖火又無話一定要運動員嘅，08年北京奧運，香港區嗰120位火炬手，都有劉華學友 Kelly Eason 喺裏面，仲有位無人識嘅07年中華小姐環球大賽總冠軍曾光添（以前我以為係變黑髮嗰個曾江，罪過罪過。）
不過，當時份名單裏面，運動員或退役運動員計埋都過唔到一半，反而政要商賈一大堆，一般市民代表就更加係少之有少，自然被外界評擊係「分餅仔」、「政治分贓」。當時嘅港協暨奧委會會長霍震霆就話，份名單係「社會嘅縮影」，希望大家包容接受咁樣…..
喂，當年揀120人去代表香港都搞成煲粥咁，宜家只可以揀1個人去做香港代表，係咪應該諗下度下，小心處理下先呢？
現役運動員要備戰比賽我明，咪搵班退役嘅、或者無得參賽嘅去囉；退一步講，或者因為廣告合約呀代言費呀時間緊迫呀……諸如此類，你無得揀運動員，咁，咪揀個形象真係好，真係夠奧運代表性嘅知名人士囉，why 阿叻先？
大台外事部回應係：陳百祥具有代表性，大家不應該質疑他的資格。
好，陳百祥有咩代表性？
電影界：Lolanto 又好、食米奇老鼠屎畫小鳥啄米圖又好，簡單嚟講，就係市井小人物求生代言詞，招積沙塵處處認叻。係好笑嘅，但，奧運係賣搞笑咩？
電視界：「我至叻」咗都成20年，識得笑會追睇嗰班都已經變中坑，近年大家記得嘅，離唔開香港小姐、泳褲、大騷、講波提荷蘭，同埋《我係乜乜乜》中嘅精彩表現，形象美其名叫自信／多諗法，換個角度講叫自大／無原則。洋蔥頭強伯潮文話事解：任何電視節目，只要見阿叻有份出現，你就知道，這個節目必會變為業餘、不認真，和像馬戲團。乜奧運宜家要宣揚馬戲團精神？
體育界（？！）：見到佢話呢次係佢「體育記者生涯」嘅烙印，真係替伍家謙流淚。成日做客席主持，訪問過吓運動員又叫自己記者；講波又唔夠專業，一味冷嘲熱諷唱好荷蘭勁。計數嘅話，佢同運動有關嘅，好似得明星足球隊成員，同練馬，不過佢嗰啲又好似唔係奧運馬術比賽馬囉，咁又點代表體育界呢？
香港人：好啦，其實阿叻真係好代表到一種香港人，就係凡事功利、專搵著數唔衰得嗰種脫節一代。
曾經我哋會睇「我至叻」，會鍾意睇佢做小人物，因為或多或少撫心自問，我哋都信奉過佢嘅香港仔精神：唔好樣唔算有咩特別才華，靠人脈靠投機呢啲走精面嘅方法成名，由破產走到可以「叻哥遊世界」，目標明確，就係以搵錢為目標，市井小人物風光登頂，點都係好睇嘅。
咁點解宜家會脫節？因為個世界會變㗎，因為宜家個地方唔再畀人用香港仔精神上位，唔係真係英雄莫問出處，而係好似上左岸嘅阿叻講，係「連八間大學都考唔入，咁樣我點話你叻呀？」嘅氛圍，係要講學歷地位與關係。
今日嘅香港唔再係玻璃都變鑽石，搞乜都鬼死咁叻，而係咩都要睇上面，年青人睇唔到發展嘅修羅場，咁，你叫人點樣仲支持阿叻嗰套思維先？
曾經係 underdog 嘅阿叻，選擇停留喺20年前無變過，被唾棄，實不為過。
大台愛阿叻，因為佢一直忠心，可惜香港人當日無齊心，畀阿叻有機會施展「跪．回家」，展示驚人體能，咁佢都算係為體育界 make a difference 嘛。
無論係「爛扣」嘅被代言，定大台嘅「亂代言」都證明咗，搵代言人真係好緊要㗎，阿叻話深深感受到何謂「薪火相傳」，如果呢種火真係傳落去，香港呢個品牌真係不敢想像。因為，香港已經比一個由689人揀嘅「代言人」整衰晒個 value 啦。嚟緊9月，大家真係要揀番個好嘅代言人，唔好似我喺黃埔啲男行家咁，畀人笑足咁耐唔識揀呀！
（本文純屬作者意見，不代表香港01立場。）