你背叛佢一次又一次，結婚對你呢啲用下半身諗嘢嘅男人嚟講係冇約束力。
上一集點解Mall姐咁順攤，春嬌講兩句就由佢結婚？
因為Mall姐一早已經審咗張志明！
時：下午四時（與Mall姐約春嬌同日）
地：中環某coffee shop
人： 無綫電視劇《不懂撒嬌的女人》第八集Mall姐凌敏（M）、電影《春嬌救志明》張志明（志）、張志明朋友及廣告公司同事李公公（李）
M：［電話中，勞氣］咁小事我畀半個鐘頭你哋，搞掂就email畀我。之後放個break。［中餐館侍應進入咖啡店，將中湯放於M面前桌上］我今日唔返公司，一陣收到我睇完打畀你，你再lead住佢哋改好佢。聽日朝早我要見到份嘢喺我枱面，唔好再交啲圾垃畀我。［收線，一口氣飲晒玻璃杯中水］
［中餐館侍應從咖啡店門口出，志躲在咖啡店外一角，偷望M］
李：［VO］你又打電話嚟。食藥咩？幾分鐘打一次，每次幾分鐘。
志：［電話中］我都想食啲藥呀，依家我好劣、好想縮呀。
李：［VO］女人一個，怕佢有棍？
志：［電話中］有棍我反而唔驚呀。我結婚，關佢叉事咩？次次都出嚟煽風點火，啲無拍拖嘅女人真係心理唔L平衡。我一陣影佢相send畀你，你就知道有幾恐怖。自己一個坐喺度都黑面、兩邊法令紋出晒嚟，冇人敢行埋去呀。佢啲氣呀，冚冚聲咁撲埋嚟。
李：［VO］D你，驚就唔好出，出就唔好驚啦。又話避冇可避，余春嬌一定請佢嚟飲。你家陣拆掂佢有著數呀。到時你敬酒，佢先爆你紅酒樽咁就真係恭喜你喇。喂，你搵個高人補習過喎，記住……
志：笑，笑到佢驚，笑到佢心寒。［收線，吸氣，笑。行入咖啡店，坐M對面。］
志：Mall姐。
M：好少咁準時喎。
志：［嬉皮笑臉］係咩？我一向都好少遲到嘅。［M瞪眼］好少，但係都有嘅。
M：飲咩？
志：呀……
M：唔使叫，我叫咗畀你。［指向桌上中湯壼］
志：［揭開］哈哈，雞湯？
M：係呀，中式北方走地雞。啱唔啱？
志：［強顏歡笑］啱，好啱。Mall姐你咁勁，喺咖啡店都可以搵到中湯。［拎起匙羮準備飲］
M：［搶回湯壼，冚蓋］依度係coffee shop，你咁大個人有冇分串？喺人哋舖頭可以飲其他嘢咩？
志：［微笑］咁我叫杯嘢先。［舉手示意店員落單］
M：［舉手示意店員走開］唔使咁麻煩，我講完你可以走。張志明，點解你唔放過余春嬌？
志：［呆，回神］……Mall姐，你唔好講到結婚之後我會害死佢咁啦。結婚係一件好事嚟呀，係女人都想結婚啦。
M：我唔需要，如果結婚對象唔係好人，最後都係會離婚，結嚟做乜，嘥錢嘥時間。尤其是嗰個係你，春嬌可以搵到個更加好。
志：［忍住唔爆］呀Mall姐，咩叫尤其是係我呢？我就係我，余春嬌就係鍾意我，我點樣呀？
M：你背叛佢一次又一次，結婚對你呢啲用下半身諗嘢嘅男人嚟講係冇約束力。我可以肯定你一定會再傷害春嬌。你有往績，我咁嘅推斷無錯，好客觀。
志：［激動］客觀？愛情就係主觀。如果可以客觀解釋同分析感情嘅話，咁你一早有拖拍，一早結咗婚啦。
M：邊個話我要拍拖？邊個話我要結婚？
志：就當你唔想拍拖同結婚，咁點解你身邊嘅人唔可以拍拖，唔可以結婚？你還你，人哋拍拖結婚要得到你批准？我知Mall姐你喺商場打橫行，叫隔籬舖嘅人送壼中
湯入嚟coffee shop都冇人敢say no，因為呢個商場係你話事，你喺你個場打橫行，我唔理你，亦都理唔到。但余春嬌揀自己條路點行都要你管？［搶中湯壺，飲湯，食雞。店員從後上來想提醒，見到M立即轉身扮睇唔到］
M：答我，點解要同春嬌結婚？係咪想搵個人生仔？係咪想佢照顧你？係咪你應承咗佢個衰老豆要養佢？［志一直低頭食雞，將雞骨放於桌上玻璃杯中］張志明！
志：［抬頭，手拎雞腳食，一邊凝望M繼續食，食到啜啜聲。M怒目而視］Mall姐。［手拿着雞腳骨］我拎住呢個係咩？
M：張志明，你係咪覺得自己好風趣？
志：我認真問你，你答我呢一條問題，我就答你嗰幾條問題。
M：雞腳。
志：我話佢係鳳爪、雞骨。［將雞腳放到玻璃杯中，拎起玻璃杯］其實根本係一隻雞。
M：我已經答咗你問題，你唔好再浪費我時間。
志：我都答咗你。係一隻雞！有啲嘢係分唔開。我係咪想搵個人生仔？係。我係咪想余春嬌照顧我？係。我係咪應承咗Dad~dy要養佢？都係。但係呢啲同我鍾意余春嬌係冇衝突。我食雞腳食到啜啜聲，唔代表我淨係鍾意食腳唔鍾意食脾。我可以鍾意食成隻雞，連雞頸、雞子我都鍾意食，咁得唔得呀，Mall姐？
M：我知，你係雞都鍾意食，唔單只係雞湯。
志：大姐呀，我認。我仲食過好多雞。細個會食肯德雞，大個少少開始鍾意食風沙雞，依家會食韓式炸雞，但我食過咁多雞，先知道我鍾意食燒春雞。我鍾意，但係解釋唔到畀你聽。何況點解係你要明，先至係愛情？春嬌佢明，我明，就夠喇。我哋個世界係得兩個人咋。
M：春嬌要結婚，我冇權反對。我當佢係細妹，先約你出嚟問清楚。今日你畀呢個答案我，我會記住，我會望住你，呢一世都望住，你唔使旨意出蠱惑。
志：我點出蠱惑呀Mall姐，四圍都係你嘅線眼，乜嘢都under你control。
M：你知道就好。我警告你……
志：對春嬌好嘛。我應承你：［拎起裝滿雞骨玻璃杯］I do chicken right！［嬉皮笑面］
M：幼稚！
志：擺酒如果係中式嘅話，我會將炸子雞變做燒春雞，以表我心意。
M：張志明，你唔好……
志：得寸進尺嘛！明！
M：得喇，你走。
志：咁我走先。到時早啲到。［起身，轉身想走］
M：Coffee shop自己食完嘅嘢自己執返。係咪要教？
志：［拎起個杯］係嘅，係嘅。byebye Mall姐。［轉身，走到垃圾筒前，舉行杯，回望Mall姐。邊倒骨時邊細聲講］無伴終老、孤獨一生。
-完-
（本文純屬作者意見，不代表香港01立場。）