橡樹資本馬克斯投資哲學　竟與佛學「無常」有關｜珍姬蜜

今年嘅國際金融領袖投資峰會剛圓滿閉幕，財爺陳茂波開幕嗰陣，就鼓勵呢班外國嚟嘅金融領袖除了參與峰會，亦可以多在香港行吓睇吓。小珍估計財爺的如意算盤，係希望呢班金融領袖可以刺激香港旅遊業。

小珍趁機都八卦呢班金融領袖最後一日有咩行程，殊不知橡樹資本（Oaktree Capital）創辦人兼主席、現年77歳馬克斯（Howard Marks）十分之勤力，峰會完結後當晚即刻飛去東京繼續工作，中午唯一個嘅空檔都唔係去嘆美食，而係約咗班在香港客戶食lunch見面交流吓。

馬克斯作為稱霸華爾街多年的不良資產投資大師，連股神巴菲特（Warren Buffett）都係佢嘅讀者，巴菲特仲話每次見到電郵有馬克斯的備忘，會第一時間打開來睇，而且總會學到嘢（When I see memos from Howard Marks to my mail, they're the first thing I open and read. I always learn something)。

未來或出現公司倒閉潮

當日早上馬克斯出席喺四季酒店舉行嘅金融峰會後，馬不蹄停咁過去美利酒店見佢班大客仔。現場所見，橡樹資本在香港嘅投資客戶雖以亞洲臉孔為望，但當中亦不乏外國投資者。而菜單揀咗三道菜西餐，當然主菜係馬克斯在午宴嘅宏觀經濟分享。

馬克斯強調，隨著多年零息的時代已經過去，金融市場正經歷一場巨變（Sea Change）。過往低息甚至零息環境，令市場充滿「Easy money」，傾向以高價去買而家回報一般的資產，造成資產價格大幅飆升。

而當利率而家回歸正常，馬克斯預計未來債務違約的情況會愈來愈多，甚至出現公司倒閉潮。「過去零息時代無人會還錢，每當一筆貸款到期，只要去另一間銀行再借錢做refinancing就可以。但而家家銀行審慎咗，有機會唔再借錢俾你。」

低息環境投資　如有神助

對於中美關係緊張，馬克斯自信道，橡樹資本在中國的投資活動從未有「負面經驗」，所以唔會暫停投資中國。不過，佢亦強調，投資美國以外的市場時，會著重Margin of safety﹙安全系數﹚，唔會盲目最求「最高」的回報，能得到「幾好」的回報已經足夠。

實情喺佢嘅投資備忘錄亦提到，呢幾十年投資者就好似行緊自動行人道（moving walkway）一樣，好多所謂嘅「股神」，全因為低息環境先賺大錢。佢仲話，喺呢幾十年做金融嘅人都係行大運，包括佢自己咁話。

作為華爾街其中一個最成功嘅投資大師，居然如此謙虛？原來馬克斯當年喺Wharton讀金融嗰陣，副修日本研究並因而接觸咗佛學。當中「無常」呢個概念對佢影響深遠，仲同小珍講直至而家都仲影響緊佢。「無常令我領悟到，改變係無可避免，亦無法預計，唯一可以做就只有不停適應轉變。同時亦令我學識謙卑，唔好因自己聰明就覺得可以控制世上所有事。」