「唔使賺太多錢，好希望窮人都可以食日本嘢，咩人都食得到」，堅持一碗拉麵賣31元，堅持薄利多銷，堅持經營平民食堂。眼前的日本餐廳老闆，字裡行間，他將「錢」看得很輕，「我覺得人情味是最重要，賺錢都要第一，賺唔到錢，就做唔到10幾年，不過唔洗賺咁多」。

來香港前「我都沒想過香港是甚麼」

居港20年的太田真司（50歲），外表與香港人無異，聽他的廣東話，甚至比內地新移民還要流利。生於日本九州的他，30歲時獲酒店力薦來港任職日本料理廚師。「去香港之前，我都沒想過香港是甚麼，只是知是英國的」，

剛來到時言語不通「我不會同日本人一齊的，盡量同香港人一齊玩」，

他當時已覺得，香港人表面與日本人內心一樣，可以很真。

「賣平啲......想學生食得起」

太田先生13年前決定自立門戶，在荃灣開設「和食快餐」，為讓人一眼看出是「日本嘢」，所以名叫「和食」，讓人感覺平民，所以又叫「快餐」。

「因為我想賣平啲，學生唔係每個都有錢，佢哋都可以食得到日本餐。如果一碗70幾蚊，唔係每個都食得起」。

位於荃昌中心的分店，午飯時間猶如中學生食堂，「冇話特別關係好好，有時佢哋打機打得耐，我都會講唔好意思，趕佢哋走，始終都要做生意嘛」。

「我好鍾意學生，有啲客畢咗業30幾歲，佢會話學生嗰時食過，而家都係好好味道，我好鍾意咁樣」。生意人來說，太田先生將個「錢」字縮得很細，將人情味放得很大，將責任放得很重。

「自己都窮過」

「細個嗰時自己都唔係有錢，自己都窮過」，因為自身的經歷，影響到太田先生現在的生意之道，堅持控制食品價格，令普通市民都「食得起」。「好多人都同我講，老細呀，你湯底做靚啲，賣一百多元也可以，好多人都係咁樣講」，但他每一次都拒絕，「我都唔會咁樣做，因為上百元的拉麵，只有佢哋食到，但個個都食唔到，冇理由得我賺錢，客人賺唔到錢，啱唔啱呀」。

「我覺得一定要有人情味」

太田先生自言在別處食拉麵，感覺總是不夠飽肚，於是加大自家拉麵份量，「正常一包麵嘅份量120克，我哋加到140克，我的麵沒太多配料，因為剩食麵好啲好味啲」。他形容就似食米線，「唔知米線多定係芽菜多，有時都搵唔到米線」，他又稱前來光顧的客人，最重要是「飽啲平啲好味啲」。

被問到是否理解本地俚語「賺到盡」，太田先生不太明白，但他聽到「賺」字，已說「賺錢都要第一，賺不到錢，做不到10幾年，不過唔使賺咁多，最起碼要交到租」，相比起錢，「我覺得一定要有人情味就最重要」。

令太田先生自豪的不僅是這間餐廳，還有結婚十多年的太太。提到太太的時候，他自然地以日文說：「一目惚れ，一見鍾情，而家都係一見鍾情。」因為他們一起工作，一起生活，「大家做乜都一齊，佢都對我好好」，即使平日無休，一年只有過年時放假，但兩口子也一齊捱，彷彿是一件無比浪漫的事。