姜晧文8年前拍攝電影終於上映 無懼影業寒冬：相信港產片唔會冇
撰文：吳子生
出版：更新：
姜晧文（黑仔）今晚（11日）現身尖沙咀出席電影《曾經擁有》首映禮。提到電影相隔8年終於出土，黑仔接受《香港01》訪問時表示：「其實啲印象係好模糊，但睇返啲劇照，回憶又開始返嚟。喺呢8年裡面，我曾經有問過導演套戲幾時會上映，當我問咗成3年咁耐，之後我再冇問落去，而且我都唔知咩原因唔上得，而我都打定輸數套電影係唔會喺戲院度上映，都只係會諗可能喺平台播。點知喺舊年突然聽到有消息話套電影會上，個人梗係開心啦。（片酬有冇收足先？）片酬有冇收足⋯⋯嗰陣時咁梗係有。」
對於有指2025年香港電影市道將步入寒冬，黑仔表示：「可能呢個係我哋呢行嘅艱難嘅時期，變咗大家要加油，我諗以前最難嘅難關都話得到，咁所以今次應該係冇問題。但我都仲見到有啲製作仲郁緊嘅，咁所以我好相信港產片一定唔會冇嘅，我唔相信香港係冇戲拍嘅，呢個我唔擔心。」