林盛斌Bob初見大女男友成個人㷫晒 特別叮囑入房玩︰記得開門喎
撰文:許育民
出版:更新:
由黑哥姜皓文監製及主演的賀歲片《哈哈哈新年喜戲》,昨晚(4/2)舉行首映禮,一眾演員包括姜皓文、Dada陳靜、李璨琛及阿Bob林盛斌都有出席。Dada在戲中跟黑哥會有火辣演出,不過全程都獲太太殷寧批准,事後更嫌老公演得不及Dada放。
日前Bob在社交平台出post,爆16歲大女霏霏新年期間帶男朋友來拜年,今次是阿Bob首次見囡囡男友︰「開心嘅,連我啲朋友見到都話佢幾乖,幾靚仔,仲幾高,我都覺得幾好。佢又好識體面,帶了媽媽親手造的手工果醬來拜年。所以到我個女第二日過去拜年時,我就叫佢帶晒我出嘅撈麵、鮑魚呀過去,連我老婆都話我好畀呢啲嘢人。」
阿Bob都覺得已經16歲女,拍拖都好正常,不過始終係第一次見囡囡男友,坦言都會緊張大「嗰刻成個人㷫晒,腎上腺素標升。」在旁的李璨琛立即追問︰「有冇由上到下打量下佢,你條𡃁仔!」阿Bob都笑言只是禮貌地交談一下︰「最緊要正正經經,乖乖地,唔好做埋啲古靈精怪嘢,我話你哋去玩啦,最緊要,記得開門喎!」引得全場大笑。
同樣有個女的李璨琛,聽完都似有感慨,笑言驚唔到咁多︰「個女幼稚園中班,已經話有幾個男仔鍾意佢,啲男仔坐校車時專登坐埋去,又拖阿女隻手,有日又話個男仔專登坐佢後面,踢佢張凳引佢注意,我心諗呢啲計仔我都要小學先識,而家幼稚園已經係咁。」問到琛仔將來個女帶男朋友返屋企,又會點應對。「都係嗰句啦,唔好閂門!」