【賀歲片】壓軸必備拜年Shot 《家有囍事》創先河恭喜大家發財
要成為一套典型的港產賀歲片，有幾大原則定必要遵守。1．要大堆頭；2．情節要喜氣洋洋；3．戲名要好意頭；4．壓軸一定要同大家講︰「恭喜發財！」
最後一樣，基本上係鐵則，不過次次唔係講恭喜發財就改個生肖名配個咩年行好運，未免太公式化，其實歷年都有好幾部經典賀歲片，片尾都花點心意製作，你又鍾意邊套多啲？
《家有囍事》同觀眾拜年始祖
大家都記得《家有囍事》（1992）Ending，係連埋老爺奶奶四對人一齊行婚禮，唔單止唱埋《家有囍事》，仲講埋恭賀說話同觀眾拜年。據黃百鳴講，壓軸同觀眾拜年的傳統，正正係由《家有囍事》開始。自此亦成為港產賀歲片的指定動作，都幾喜氣洋洋。
《嚦咕嚦咕新年財》百人海灘雀戰
襟睇程度拍得住《家有囍事》的有杜琪峯韋家輝執導的《嚦咕嚦咕新年財》（2002），「人品好牌品自然好」、「麻雀回來必有因」、「老友返嚟」，句句都成為近年開檯打牌必用對白，加多句「八婆已經夠貼切，加個臭字就Out」，令電影16年來歷久不衰。
至於壓縮拜年戲，就找來百幾人在海邊開檯，然後仲要將《男兒當自強》改編成《大勝無限番》，由劉德華主唱︰「記住男兒當食～南」極有氣勢，簡直將打麻雀的層次無限提升。最後由古天樂、劉青雲、梁詠琪、應采兒各自打出一隻發財，祝大家都發財，觀眾梗係照單全收。
《喜劇之王》最真實茄喱啡觀眾
《喜劇之王》（1999）當中，以一場話劇《雷雨》去表達尹天仇（周星馳 飾）有幾咁愛演戲，最後經歷過臥底測試後，更證明自己真係演技有限。不過電影壓軸，就同樣以《雷雨》作結，不過就講到轉咗大場，成千觀眾撐場！其實呢一幕係來自當時《喜劇之王》一眾演員在工展會上宣傳的片段，經過剪輯後就成為《雷雨》的公映場，仲請到杜娟兒（莫文蔚 飾）做嘉賓。成千觀眾做免費老臨，而且效果逼真，星爺呢下真係識計數。
《72家租客》大型歌舞歡樂年年
曾志偉重投賀歲片市場，於2010年拉攏TVB參與籌劃《72家租客》，同年力爭稱霸好幾年賀歲片市場的黃百鳴，雖然在票房上最終都輸俾《花田囍事2010》，不過就成功重啟賀歲片戰事，隨後幾年仲一人一部鬥到你死我活，話題十足。而《72家租客》的結尾，就一大班人走出嚟載歌載舞唱《歡樂年年》，又比一字排開棟篤企住同大家拜年，有心思得多。