【消失的食店】睇《國產凌凌漆》見番馬里奧 最掛住Wendy’s漢堡
當廚師腸都話將會消失於世上時，那些觸不到的集體回憶似乎愈儲愈多。其實關於食，港產片入面，都為大家留下不少回憶，當中更不乏已消失的大型連鎖食肆。例如《國產凌凌漆》就在皇室堡馬里奧出面槍戰，《開心鬼放暑假》亦有去到Wendy’s取景，呢幾間食肆，你又有冇幫襯過？
《開心鬼放暑假》Wendy's
睇《開心鬼》系列，重點唔係黃百鳴，而係一班青春少艾，來到系列第二集《開心鬼放暑假》（1985），就有袁潔瑩、羅美薇、陳加玲，以及當年還在用藝名「孫慧」的傅明憲。當年套戲應該得到Wendy’s贊助，唔單止有成場戲在入面拍，更有不少食物shot，睇見都想食。
Wendy's於1982年首次進軍香港，挑戰麥當勞一哥地位，可惜4年後已不敵，於1986年撤出。事隔5年，呢位孖辮妹改名為「雲狄斯」捲土重來，呢次奮戰時間較長，全盛時期更有十多間分店，但去到2000年頭再次撤出香港。
《國產凌凌漆》馬里奧
堪稱星爺經典作三甲之一的《國產凌凌漆》（1994），笑料密集得來，情感的描寫都精彩，以這幕在皇室堡取景德仔老竇被殺，從而觸怒凌凌漆要展現他的飛刀神功，就夠晒起承轉合，將戲和人都推進一步。
戲中遇見湖南幫兄弟並發生槍戰，而槍戰地正是當年走中價路線的意大利餐廳「馬里奧餐廳」門外。在90年代，想食好啲又要花得起，奧里奧餐廳都算唔錯選擇。可惜就係因為它走中價路線，在兩邊不討好的情況下黯然結業。
【星爺研究院】《國產凌凌漆》回憶中的皇室堡 消失的馬里奧餐廳
《逃學威龍2》東東雲吞麵
又係星爺作品，今次到《逃學威龍2》，星爺暪住張敏，被革職下花盡老婆本去偷偷做臥底，結果就在東東雲吞麵店入面，拖住朱茵下遇到未來外父外母，身陷「險境」，更慘係得到拍檔吳孟達出口相助，成件事穿晒，不用再隱瞞之餘，亦不用再結婚。
對新一代朋友而言，東東雲吞只是超市入面售賣的急凍食品，其實早在80年代，東東雲吞麵是有門市，並開創了雲吞麵舖都有連鎖店的先河，自助形式更有別街坊式經營，不過這種食手藝的美食，好難以連鎖式經營，最終去到2000年便全線結業。
《最佳損友》烤雞大王
要數《最佳損友》爆笑場面，多不勝數，但要數四位賤男的「愛情觀」，幾位在烤雞大王入面便金句盡出。好似曹查理話︰「好就女人，唔好就累人，所以一得到手就要撇。」呢種押韻句式，到今時今日葉念琛都有用。而陳百祥一句︰「冇理由為一棵樹放棄成個森林」早就成為愛情定律。最後馮粹帆更爆出一句︰「總之女人，60歲前唔好同佢講真話，70歲前唔好俾飽飯佢食。」句句都咁歷久常新，久不久聽番都仲係咁警世。
至於烤雞大王，其實是80年代的一大連鎖食店，在KFC未抵港時，這種中式製作烤雞就曾經大熱過。不過該店壽命較短，好快就全線結業，印象較淺。