【義不容情】韋家輝拆解丁有康成魔之路:丁有健好人到迂腐



撰文:趙允琳
出版:更新:

由韋家輝導演執導的電影《神探大戰》昨日(20日)舉行煞科宴,劉青雲、蔡卓妍(阿Sa)及林峯等一眾演員均有出席。《神探大戰》與10年前的《神探》名字相當接近,難免會令人覺得是《神探》的續集。導演多次強調是完全不一樣的故事,而「神探」兩個字在兩部戲中亦代表不同的意思:「戲裏面有一班神探,而神探唔係代表警察,而係代表去殺人嘅人。」暗示了這部戲有一大部分的警察都會是反派,將會於正派警察展開大戰。

韋家輝導演首次與林峯合作對他十分滿意,他表示創作角色是就馬上想起他,希望這個角色可以交給一個正氣的演員做出巨大反差的感覺。(梁碧玲攝)

壞人源於好人太縱容

雖然韋Sir的新作要等一段時間才看到,但最近深夜熱播的《義不容情》,亦令不少後生仔驚嘆為何30年前的劇集會有如此張力,討論熱烈程度比起台慶劇更加犀利,尤其劇集去到尾段,丁有康(温兆倫飾)奸到出汁,看得觀眾咬牙切齒,究竟這角色當時是怎樣設計出來的?他說:「我睇返我以前的作品,好多時正邪對決係一個好重要的課題,當時《義不容情》有一個概念就係,好正派,正派到近乎一個迂腐的丁有健(黃日華飾),我需要一個相反,因為佢好縱容,太好人,跟住就會衍生由一個本來可能冇咁壞,本身可能係一個可造之材,大好青年,然後變咗一個好壞嘅人,呢個係我一個主題嚟。
嗰時溫兆倫都好少做反派,佢做《城市故事》呀,都係靚仔、乖乖仔咁,我會覺得佢其實都做到令人恨之入骨嘅角色。我好怕揾一個人做反派,但做到擠眉弄眼,其實唔需要,好多時人世間見到嘅壞壞哋嘅人,嗰樣係好嘅,係正人君子,但佢嘅行為係邪惡嘅。」

韋導演表示在《義不容情》設計「幸運星」這個橋段是想要展示關懷和關心,而當時靈感來自於編劇組的一個女職員的真實經歷。(梁碧玲攝)

幸運星情節由身邊編劇啟發

除了丁有康外,幸運星亦是《義不容情》一個簽名式的情節,原來這個橋段源於韋家輝那一作品《流氓大亨》。「《流氓大亨》我入面好喜歡一個小節,有個音樂盒,有個小天鵝,有個水晶喺到轉⋯⋯亦有齊瓦哥醫生音樂喺到,出嚟之後我自己好鍾意,去到《義不容情》我需要一啲嘢去代表關懷,我就諗有啲乜嘢可以擺落嗰戲到呢?當時我編劇組有個女仔,我最鍾意訪問身邊嘅人,嗰女仔話佢家姐被佢姐夫追到,就係因為佢姐夫摺咗啲咁嘅嘢(幸運星),我覺得呢啲都幾有趣喎,我就擺咗落去。」

【義不容情】溫兆倫邵美琪聯手創經典 逐格重溫神劇最精彩一幕

導演說拍攝《神探大戰》已經用了70多天時間拍攝,拍攝電視劇的話自己的體力一定會更吃不消。(梁碧玲攝)

體力應付唔到拍劇

韋家輝導演自從轉戰電影後甚少參與電視劇,曾否「技癢」過想再次拍電視劇?「年紀大唔太適合!我拍電視劇成日要好大體能,拍《大時代》嗰年我基本上不眠不休,當年我仲係20幾歲!我懷疑而家50之後,仲有冇咁嘅體力去拍呢?因為電視劇篇幅太長,(而家網劇會短啲,用電影手法會唔會好啲?)電影手法仲死,我拍《神探大戰》拍咗七十幾日,我覺得唔係篇幅長短問題,電影都係兩個鐘啫,而係你嘅創作方法同工作方法,我係諗到就去拍,就會令你冇辦法去休息,拍嘅嘢嘅時候就係一個作戰狀態。」

你可能感興趣