Agree with your boss？唔係財爺唔好亂講
「You always agree with your boss. No question about that」？你又唔好以為乜都可以照抄，講每句說話都要睇身分、場合同對手嘅。重點係，如果老闆個命令真心膠，你 agree with 佢好易出事。
You always agree with your boss. No question about that？
財政司長曾俊華一向幽默，2013 年同梁振英落區，有示威者想向梁扔蛋，薯片叔叔唔好彩幫佢「食」咗，不過佢中蛋後完全唔嬲仲輕鬆回應。又曾經喺立法會講解財政預算案時被長毛梁國雄以道具抗議，佢無叫主席趕長毛走，仲讚長毛個道具整得靚，長毛內心應該啤一聲。
曾俊華轉數快，一次又一次化解尷尬情況，成個人都充滿辦公室智慧，呢方面實在係好好嘅學習對象。特別係前日橫洲發展記者會上一句「You always agree with your boss」，真係令人拍爛手掌。
同意定唔同意 先分清老闆係咪真心膠
好多香港人都開定包花生，期待睇「梁曾風暴」，記者亦狂問曾俊華覺唔覺得梁振英卸膊，係咪同梁「唱反調」等，見曾司長黑口黑面，希望問多兩問佢會爆，結果：「You always agree with your boss」，由辦公室層面翻譯可以有兩個解釋：
問：「嗱！你同唔同意呢單嘢個決定？」
解釋一：「同意，老闆叫嘅，可以點啫。」
解釋二：「唔同意，但我老闆叫我做，無計㗎喎。」
一答，同意定唔同意都唔重要了，字面睇完全係認同老闆，所以老闆無得嘈，諗深一層又可以講出「唔Ｌ關我事」嗰種無奈。
不過，你又唔好以為乜都可以照抄，講每句說話都要睇身分、場合同對手嘅。重點係，如果老闆個命令真心膠，你 agree with 佢好易出事。
老細叫你聞廁所，你 sure 你 agree？
有日，Admin team 阿姐好緊張同新同事 Bob 講：「大件事喇！！！啱啱我路過見到 CEO，佢話公司個男廁好臭呀！你快啲入去聞吓係咪真係好臭。」Bob 連同附近所有同事先呆一秒，然後就忍笑，「去聞吓個廁所臭唔臭」究竟係一個咩 task？直接叫清潔姐姐放個香薰咪算囉。再講，阿 CEO 都只係路過講咗句類似「得閒飲茶」咁嘅嘢啫。
Bob 係 90 後，入職兩日，全無反抗能力去咗聞廁所，報告完無臭味諗住無事啦，點知阿姐話：「無理由，唔通 CEO 亂講咩。可能頭先臭𠵱家唔臭，以防萬一，你每朝 10 點就去聞吓臭唔臭。」
再問一次，有無人答到我究竟「去聞吓個廁所臭唔臭」係一個咩 task？結果可憐嘅 Bob 聞咗 3 日廁所，臭味無乜，但覺得「伏不可耐」就辭咗職。
老闆總沒錯？ 用吓自己個腦
之前講過有一種生物叫「公司垃圾」，佢升職只因年資深，同能力無關。有次搞活動，其中一個貴賓想要公司高層嘅中英文名同職銜，剛好公關小薯唔喺位，公關經理就好醒咁自己將高層資料打晒出嚟。小薯返埋位，經理就話：「頭先某某打嚟話要啲資料，我打好晒，你 send 畀佢啦。」小薯萬七樣工作未完成，send email 咁簡單當然即刻做，而佢點會諗到，公關經理叻到連自己高層嘅名同職銜都打錯晒，結果係貴賓打嚟問小薯係咪搞錯咗啲嘢，你大老闆個名好似唔係咁串喎。
分享多個 case。話說老闆想建立公益形象，計劃搞啲社區活動，安排一班小學生去某上市公司參觀、學習。老闆話 Cherry 係最後生果個，比較貼近小學生年紀（老闆的神邏輯）所以要佢做統籌。Cherry 咩都未上手，震騰騰打去間公司問可唔可以畀學生參觀，我相信任何人聽電話都會答「唔可以」，因為佢講唔出件事對對方公司有咩着數，又無錢收，完全就只有麻煩麻煩同麻Ｌ煩。
Cherry 無功而回向老闆交代，老闆好 supportive 呀，佢話同該上市公司的大老闆好熟，親自打畀對方傾。老闆同老闆傾，對方畀面應承。一收線，老闆就叫 Cherry 打返畀頭先 reject 佢嗰個人，
仲教佢講：「你大老闆林生都應承咗。」
點知 Cherry 一打去就畀人鬧：「你𠵱家即係搵我老闆壓落嚟？」
Cherry：「唔係，唔好意思，只係我老闆話要咁講，佢話已經同林生傾好咗。」
結果又鬧：「你老闆話要咁講你就咁講？出嚟做嘢要自己用吓個腦……」
You always agree with your boss？
You HAVE TO question about that.
（本文純屬作者意見，不代表香港01立場。）