打工仔，請不要為天災喝采
位於食物鏈最低層，我當然知道喺香港生活有幾難捱，但呢兩日聽到左一句「正呀打風！買定料打邊爐。」右一句「破力場啦！好想放假。」我內心卻不是味兒。
畢業幾年，我們嚐到生活很苦、工作很忙、假期難求，上天賜的風假很吸引吧？我以為只有中學生先會咁諗，我讀書時也很期盼打風，但人一路成長，會睇新聞、會見到生離死別，每逢颱風都造成許多許多人命傷亡，慢慢我提醒自己，「颱風」其實是天災，沒什麼值得慶祝或祈求的。你有見過台灣人祈求地震嗎？有見過日本人求海嘯嗎？香港人太幸福，對「天災」一詞太陌生，我們的腦袋被「工作」支配着。
曾經，我都係極渴望8號風球放假嘅人，但認識咗一位好有愛心嘅朋友後，我慚愧了。
呢位朋友每晚都落街餵流浪貓狗，我跟過佢去，小動物一聽到佢把聲就走出嚟，每隻都知自己一定食得飽，所以從不爭食，成個畫面好有愛。有次打風前夕，我諗緊買咩零食返屋企嘆，朋友卻擔心到想喊，因為一打風就好多流浪動物會死，人類拆散咗動物的自然環境，害牠們無處容身，仲要天災時拍哂手掌。
仲有，無論8號或10號颱風下，一樣好多人要照常返工，緊守崗位，佢地返工放工，甚至工作期間都可能會死…
「咁佢地入職嗰日就預咗啦！」
喂，你唔係都知道生活好苦咩？唔通就只有你打工係辛苦嘅？人地為養家搵命博，人工亦唔高：巴士、的士、鐵路司機、機場各人員、傳媒工作者、你屋企樓下個看更......當然少不了大家很尊敬的消防員，淘大工業村迷你倉大火後兩個消防員殉職，嗰排大家唔係好關心消防員咩？送水送餅送慰問......善忘的香港人，你高高興興放一日假，背後不知多少無辜家庭因此破碎，捐幾多錢都補唔返。
「風要打就打㗎啦，我求唔求都影響唔到，講吓都唔比咩。」
唔係唔比講，但關愛社會多啲，講啲正面打氣嘢，好過研究死人塌樓之下仲買咩料打邊爐。我做過10號風球都要返工嘅工，明知自己有責任喺身，我唔會抱怨，當時年少嘅我甚至有拯救世界嘅熱血感。但橫風橫雨下，我call成個鐘的士先有人肯載我，一推門出屋企大廈門口就企唔穩，仲要驚吹爛大廈度門要我賠。平時兩分鐘就上到車，打風要20分鐘先一步步行到出去，仲要被的士司機Jip我整濕佢架車。
坐喺車度，兩邊都係洪水，我內心默默祈求唔好咁樣死。返到公司，一打風就打仗咁，比平時更忙亂！電話不停響、風暴消息不停變、稿不停改……lunch嗰盒飯仲要特別難食。聽住邊度有交通事故、有人追風墜海、有老樹倒下、有人住嘅木屋入水或倒塌……放工打開社交媒體，卻睇見大家圍住爐或拎住咪高峰，慶祝咁多慘事嘅一日，心情更沮喪。
據說聽日有可能打風，我知你而家好開心，但請諗吓其他人嘅感受。最基本係唔好叫外賣！因為送外賣比你嗰個都係人，佢都會有危險，少一個call，佢就多一分安全。同埋唔好喺網上跳求雨舞，講多幾句打氣說話好嗎？肉體上幫不到什麼，心靈安慰都好。
最後，我再三重申，我知道返工好攰，但作為一個有良心嘅廢青，我唔望打風。
攰嘅話，我會sick leave。
（文章純屬作者意見，不代表香港01立場。）