【靚女唔易做】職場靚女的原罪
上兩個月寫過一篇文探討為什麼男人較易肩膊疲勞，講吓男人之苦、遇到不如意事無處可呻，男讀者們看得很爽。
而女人喺職場上都有啲避不開嘅難題，而難題的出現，往往就只因為女人係女人。
雖然我地即將有個女特首，仲聽講話下屆財政司長同律政司長呢兩個位都有可能係由女性擔任。但睇返我地呢啲普通蟻民嘅 office，一提起「女人」、「職場」，被諗起嘅都唔係工作能力，而係佢嘅外貌同戀愛狀況，靚唔靚？有無拍拖？有無結婚？有無生仔？老公係咩人？統統都「搶鏡」過「佢為公司付出過乜」，我舉幾個例你就明。
妳的樣子如何，妳的日子也必如何？
假設你係女性，有日你約咗一個普通男性朋友食飯，講起公司啲勞氣事，你想話佢知你公司有個女同事好蠢，成日帶麻煩比你，你同朋友講：
「公司個女同事 Ada 真係勁蠢，一日錯十幾次，好簡單嘅嘢都可以錯，叫佢 send email 比 Ben，佢竟然 send 咗比 Benny！」
男性朋友個反應係：
「吓，咁都得？佢靚唔靚架？」
啤！！！真係吹到啤一聲，你講完一大堆嘢，佢只係想知 Ada 靚唔靚，因為靚嘅人蠢，叫「得意」，唔靚嘅人蠢，叫「死蠢」。
相反，無論你同男定女講「公司有個男同事好蠢……」好少人第一個反應就問：「佢靚唔靚仔架？」就只係女人，喺做得好同唔好之前，都要比人評吓個樣先。
「喂，係咁架啦，靚女着數啲係必然架喎。」
呢句句子未必啱哂，靚女得到嘅着數可能係有一班男同事喺身邊做伙頭兵（請食飯、買早餐）、運輸兵（車出車入）同水兵（金錢支援）等等，但認認真真講工作嘅話，佢所需要付出嘅努力分分鐘要比其他人多好多，先得到認同。靚女嘅努力好易由於外表出眾而比人抹殺，將佢定性為「花瓶」，無論佢幾比心機，大家個話題都係佢個樣，連佢升職都比人認定係靠個樣，仲要佢覺得委屈都唔可以亂同人呻，因為一呻就係曬命、扮哂嘢、以為自己好靚。
講靚女當然要講吓明星，仲記唔記得有個女明星叫李彩華？你而家可能唔覺得佢靚，但初出道嗰陣的確係清純吸睛，記得佢第一個廣告係某牌子打印機，該牌子打印機一向專搵型男美女做代言，包括古天樂、朱茵、陳慧琳，肯採用當時嘅新人李彩華，證明對佢星途有一定信心。
其後李彩華嘅發展唔算好順利，又唔知點樣比公司雪藏，結果就消失咗，間中聽到佢嘅新聞唔係欠債就整容，話佢外表唔同咗，將佢啲新舊相拼埋一齊找不同，除咗個樣，好似無人理佢呢十年八載發生過咩事。直到最近無意中睇到一篇關於佢嘅訪問，原來佢喺大陸拍劇受咗好多辛酸，包括比人老點去一個連電話卡都買唔到嘅山卡啦地方拍劇，但等成個月都未開戲；做完嘢收唔到尾數，佢同好多正常人一樣無錢收就唔開工，但唔開工換嚟嘅係被恐嚇，喺佢酒店房外不停拍門大吵大鬧，一個女仔喺大陸面對呢啲事真係要好堅強同勇敢，但上網搵一搵，大家都係比較留意佢點樣由陳敏芝咁嘅樣變成周汶錡咁嘅樣。
明星比人講樣好正常？如果你office有靚女，你會發現大家都一樣係只關注佢個樣。曾經有間公司，有個好努力工作嘅女同事叫 Carol，五官標緻、皮膚白滑，身型亦均勻，總之大部分人都覺得佢係靚女一名。當然佢外表有為佢帶嚟着數，例如明明未有機會同高層正式合作，但高層一早己經喺其他人口中聽過佢個名亦記得佢個樣，一間 200 人嘅公司入面，大把人做兩三年仍然係高層眼中嘅「一臉無名」，但 Carol 入職幾個月已經比人認得，老闆記得你，機會自然較易落到你手，但亦都要有心理準備會聽好多閒言閒語：「老闆想溝佢先比個 project 佢跟」、「成日有單開，可能係『床單』」。
Carol 的確係聰明同用心工作，升職有如坐火箭。有次要同澳門同事一齊做同一個 project，開會前，老闆正式介紹 Carol：
「呢個係我地新晉升嘅營業部經理 Carol。」
點知就有一個澳門女同事語帶不屑咁話：
「我知……靚女呀嘛，聽過啦。」
好彩 Carol 反應快，笑笑口咁話：
「你靚啲。」
澳門女同事即刻靜咗。靚女返工，仲要無原因地承受其他女性嘅仇視，你並無傷害過佢甚至只係第一次見，但佢就係對你懷有敵意，真係躺着也中槍之靚女行出街就有敵人。講返澳門同事，其實初次見面就評論人地外表真係好無禮貌，而靚女就經常都要遇到呢啲情況，我諗 Carol 都係遇得多，先咁快比到一個精簡得體同秒殺對方、令佢立即收聲嘅答案。
再舉例，電視上的新聞小花靚到被稱為女神，但有幾多觀眾會認真睇吓、比較吓邊位主播讀稿清晰啲、做直播時反應快啲、問問題問得精準啲、主持節目淡定啲？唔會，大家只係睇吓佢地着咩衫梳咩頭，咁對努力練習咬字、寫稿、主持技巧的主播嚟講，不也是一種抹殺嗎？
除了外表，女人的戀愛狀況都一樣係容易蓋過佢嘅職場努力，升完職咁啱未有拖拍，少不免比下屬喺背後話係老姑婆，想叫下屬趕埋份嘢先放工，就會變成「老姑婆無人約想人陪佢 OT……」但嫁咗人係咪就咩事都無？我地下篇再講。各位靚人想搵個位呻吓你啲「靚得滯慘事」？歡迎到我 Facebook Page 留言分享。
（開估，由左至右：陳敏芝，周汶錡，李彩華。）
（文章純屬作者意見，不代表香港01立場。）