再見.枕邊人|張曦雯兩分半鐘喊戲 激動到青筋都現埋

撰文:吳子生
出版:更新:

無綫熱播劇集《再見.枕邊人》故事邁向結局周,雖然推顧晴天(黃智雯飾)落懸崖真兇仍未水落石出,但幾位男女主角的感情線繼續成為焦點,因為Rachel(張曦雯飾)收到晴天與萬森(馬德鐘飾)的擁吻片,妒火中燒的她決定終極擘面,相約晴天到中環碼頭講數玩互摑之後,昨晚(21日)一集再大晒心機,竟扮食安眠藥兼在沖涼期間扮睡著搏取萬森緊張及同情,不過由於萬森早對Rachel起疑心,當場踢爆Rachel做戲,怒羞成惱的Rachel再度爆seed反擊,信任早已崩毁的「森美戀」危在旦夕…另邊廂晴天因意外跣倒撞到頭,腦內突然湧現關鍵回憶,相關回憶再度指向萬森是Big Boss!另晴天之前腦海亦曾閃現一名滿頭鮮血的女子對她說:「你老公唔畀我見你,啲嘢喺佢度呀!」到底楊萬森是否真的有古怪?

Rachel(張曦雯飾)與爸爸朱賢達(杜燕歌飾)對話好傷感。

受盡委屈爆喊

昨晚焦點場口,絕對是張曦雯長達兩分半鐘的超委屈淚崩戲,劇情講述萬森與Rachel婚禮再度因為教堂維修事宜延期,由於Rachel深信萬森提出延期只是藉口,因而感到非常不安。Rachel父親朱賢達(杜燕歌飾)不甘女兒受委屈,欲打電話責備萬森之際,原本已進入暴走狀態的Rachel即時情緒失控,怒掟手機落地並咆哮:「唔使呀!都話唔使你囉!」並壓力爆煲崩潰痛哭:「我係委屈,但可以點呀?為咗佢,我咩都可以做,我咩都可以包容,我咩都可以忍,我愛佢呀!我好想嫁畀佢!但我逼得太緊,佢會唔要我,佢會唔要我㗎……」

張曦雯再出演浸浴戲碼。

張曦雯由眼泛淚光到淚崩再到嚎啕大哭,短短一場戲呈現出三種層次情緒,更一度哭至青筋現形,相當投入,而網民亦看得相當肉緊,直呼:「朱朱好可憐」、「我係Rachel一定同晴天攤牌:個仔歸你、個男人歸我!」另張曦雯在社交網亦分享了拍攝浸浴戲花絮片,只見著了肉色打底上衣、頭披浴巾的她浸在泡泡浴中扁晒嘴狀甚可憐,緊接傳來的是工作人員的聲音:「好慘」、「十個鐘滾水」,證明了曦雯為了拍攝相關戲份,足足浸了多個小時熱水,盡顯專業一面。

張曦雯淚腺也太發達了吧!