黃竹坑站搶優惠券鬧劇：唔好低估香港人嘅厚顏無恥
唔睇周星馳，都可能知道咩係「年初四咁嘅樣」。
剛剛12月28日朝早，大把打工仔（包括我），放咗四日假要返工，應該仲慘過「年初四咁嘅樣」。仲要天寒地凍喎，真係好想瞓多陣。
呢呢呢，就係呢種心態，所以，你同我咪冇發達咯！
自己失敗，就虛心學習下成功人士！嗰日朝早（其實係之前一晚），有幾十個勇士，就示範咗咩係香港人精神啦。人哋無畏無懼，通頂排隊呀。唔睇埋內文真係以為推倒柏林圍牆，定係第三次世界大戰重光。
到我睇完段新聞片，好想忍住唔笑，但都係笑咗。原來黃竹坑某酒店，在南港島綫啟用日搞大優惠，頭16位坐港鐵出閘嘅可以得到28蚊一晚住宿優惠券，結果演變成包圍職員搶coupon。最後人人有份皆大歡喜——除咗守規矩嘅人。原來早起嘅鳥兒唔止有蟲吃，仲有房爆。「夜型人」如我真係要反省下。
當搶嘢變成習慣
聽聞啲排隊搶酒店嘅，為左瞓一晚酒店，結果全晚冇瞓，躝一晚街。為咗瞓一晚酒店搞到一晚冇得瞓屋企，係咩玩法？鋼之鍊金術師等價交換？我睇唔透。
去到年尾，大家包容啲。唔好只講香港人貪小便宜執輸行頭慘過敗家。呢啲都係事實，但我自己做金融，又信資本主義，咁人性貪婪好合理。我都去抽iBond啦，有錢送，唔通唔要咩？
至於食相難睇，唏，包容啲。2013年上演嘅《迷離夜》入面，任達華有句金句：「生仔要床位讀書要學位做人要上位死左要靈位。」香港人邊個唔係由出世開始爭到死嗰日？資源少人多又鍾意比較嘛。你見美國Black Friday Sales，一個個Mrs. Fields咁款嘅鬼婆一樣搶平衫搶到打摔角咁嘅，唔係我城特有。
唔使講到當年科網狂熱招股表格都有得炒，或者賣樓有排隊黨咁遠。只係計呢一兩年，你見得少咩？舊年工展會變成賽馬直擊仲有人「墮馬」，大把人為咗半價雪糕平$22.5走去排9個字隊（仲可能排到你就賣晒）。Ruby Tuesday啲會員去投訴餐廳出優惠吸引啲「貪小便宜」嘅新客（對，人地平價去食就係貪小便宜但自己食特價就係鐵血丹心）。仲有每逢賣iPhone公司一定好齊人，每逢有平機票搶公司一定好靜。都慣啦？
我城金句：「我唔知喎，你冇寫明」
不過今次「搶酒店」 事件，仲有兩個好特別嘅地方。第一就係啲人排通頂，但好似唔係為錢。第二就係今次好似脫歐或者特朗普咁，完全挑戰傳統禁忌，係規矩都唔使守！
先講排通頂。你可以話品味不同，男人覺得啲女人行成個下午化妝品舖好無聊，佢一樣覺得你半夜起身睇廿二個佬追住個波踢一樣咁無聊。如果相信品味無分高低，咁都係睇你覺得值唔值得，而照計去黃竹坑爆房係遠咗啲，但應該唔係壞品味。
我屋企鄰近大會堂，成日都見到有大媽或南亞人通頂搶購演唱會飛。唔係話大媽南亞人冇文化，但斷估佢唔係去聽陳奕迅下話？有得轉手嘛，炒黃牛先係重點，成件事就好合理。但，堆黃竹坑酒店coupon，好似唔轉得手㗎喎。真係咁神心？定香港地真係咁缺乏扑嘢空間？換着身子弱嘅，咁樣吹一晚應該要抖返幾晚先有力，睇醫生都幾百蚊。
第二樣就威水咯。你發現啲人係完全唔使跟遊戲規則嘅。贏在起跑線？Out 啦，都未跑人地已經贏咗。你守規矩坐頭班車6點入去？Sorry這些機會不屬於你，一早派晒。醒目仔女捷足先登，賽事未開始已結束。規矩？咩嚟？食唔食得的？你今晚同規矩爆房啦。
成件事，其實酒店安排唔係幾好。你點證明個人真係坐港鐵入嚟？去閘口一眼關七望住啦喎。如果我排17，我話我早過前面嗰位出閘，但佢後發先至打我尖？咁你點？唔好笑。當年「中村藤吉」在香港就發生過類似事件。有人堅持話「入電梯我排先，但人哋出電梯先打咗我尖好唔公平」。
而且，目測酒店員工似係外籍人士，真係太低估我城子民。「食住上」就係香港人強項，「我唔知喎，你冇寫明」係本城金句。片中呀李小姐大大聲話「冇寫明係乘客」，令我想去驗下眼。
最初安排係有啲失當，但酒店都算醒目，面對住成班餓鬼，梗係投降為上。結果全部coupon「酌情」派晒，盂蘭節放低銀仔送遊魂野鬼咁。你講道理解釋畀佢哋知「寫到明要坐港鐵」然後DQ晒佢哋叫佢返屋企？保證你變關公災難。
不過呢，就可憐啲守規矩嘅參加者咯。雖然我覺得，6點鐘坐頭班車入去嗰啲已經好不可思議，但真係強中自有強中手。記住，夠惡夠多人圍職員就得，吵鬧就有糖食。
勿低估香港人的厚顏無恥
其實我好懷疑，呢個活動幫到間酒店幾多？你咪只係會知黃竹坑有間咁嘅酒店咯。但唔同餐廳，餐廳多人排你會想去試，你唔會因為間酒店好多人通車日去搶就覺得間酒店好的嘛？
最後，絕無曲線，服務業嘅朋友，應該由呢個故事得到以下教訓：
1. 唔好低估香港人嘅毅力
2. 唔好高估香港人嘅智慧同識字率
3. 唔好低估香港人嘅厚顏無恥
想做「參賽者」嘅，記住以下教訓：
1. 唔好低估你嘅對手（請參考樓上嗰三點）
2. 在我城忠忠直直終須乞食，循規蹈矩只會畀啲勝利者串你：「下次早啲起身啦！」
3. 記住，吵鬧就得，多人就得，管他媽的規矩。唔好以為自己真係在國際都會嘛，大佬。
（文章純屬作者意見，不代表香港01立場。）