【老味道Party food】媽媽牌「甜酸咕嚕肉」

新年一月，派對月。三傻試試創新老味道Party food。Eric找來馬老太，親授炸排骨秘技。
馬老太今年92歲，仲好生猛。佢後生嗰陣，拿手菜是炸甜酸排骨。呢一味，Eric由細食到大，當年一聞到廚房傳來甜酸味，馬上飛奔入廚房先食為快。不過咁多年，都未學得媽咪真功夫。今次試煮，雞手鴨腳，要勞煩馬老太旁邊教路。

由於是Party food，Eric把排骨改成豬柳，免得客人吃一啖就要吐骨。到街市問豬肉佬，佢介紹「梅頭」，即豬大腿半肥瘦。回家洗淨抹乾，然後切至bite size。馬老太細心解釋，醃肉要用鹽、糖、豆粉，精要是加幾滴白醋，令肉質更鬆脆。

粉漿亦有秘技，炸粉、麵粉，還要加粘米粉。Jeffrey提醒，可用啤酒代水開粉，其氣泡可令炸漿更脆。倒入少許啤酒開粉，邊攪拌邊注入啤酒，直至用筷子點漿拉起，可以滴漏便成。

Eric早幾日遊大澳，買回來原味大地魚粉，當原始天然香料，加入少許以吊味。豬肉粒染滿粉漿，炸至金黃，挾起，等一會再翻炸至香脆。

醬汁方面，先用洋葱起鑊，加醋加糖再加茄汁便成。馬老太當年，餸菜主要求美味，不重視賣相。今次Party food改良版，加上彩椒、菠蘿，用竹簽串起，開胃又醒目。

馬老太年紀大，一眾兒孫已經「禁止」她入廚免她操勞。但今次馬老太可以名正言順大展身手，老人家笑逐顏開！她知道，老味道，不簡單。兒子願意請母親教路，溫柔得嚟要有勇氣！

材料：

1. 梅頭豬肉
2. 白醋
3. 洋葱
4. 粘米粉、炸粉、麵粉
5. 彩椒
6. 菠蘿

貼士：

1. 醃肉加醋更脆口
2. 攪伴炸粉用啤酒代水，更脆
3. 咕嚕肉用酸甜汁炒。Party時炸肉與汁分開上，保持炸皮鬆脆！

（文章純屬作者意見，不代表香港01立場。）