【01博客咁睇波】真正嘅強隊 唔使識踢逆境波

撰文:李聲揚
出版:更新:

玩個小遊戲先,1982 年到而家咁多屆大賽,有一隊波反勝率有 30%,歐洲最高。估下邊隊?
係只捧過一次盃嘅荷蘭。
最低係邊兩隊?
係意大利,同德國。
你會唔會話呢段時期,兩隊波冇鬥心冇領袖?
邊個話強隊要「識反勝」?

1982年到而家咁多屆大賽,德國反勝率最低。圖為開心的梅拿。(Getty Images)

聽講,而家隊德國冇血性,冇鬥心,冇領袖。今屆歐國盃前已有人講,出咗局更多人講。但好似只見香港人講,睇開嘅德國佬評論就唔見咁講。當真香港人比德國人更識德國波?

而家隊德國冇血性,冇鬥心,冇領袖?圖為傷心的梅拿。(Getty Images)

呢堆嘢,由 2010 年已經有人講。當年隊長波歷克,世界盃前因傷退隊。結果?德國十六強先大炒英格蘭,八強再大炒阿根廷。我同意德國教練路維講,捧咗盃就個個都領袖啦。係喎,2014 年夠話冇領袖,結果咪又係捧盃?然後你就夾硬要話拿姆係「領袖」。我好肯定,如果德國 2016 捧盃,一定冇人再出聲。

冇鬥心?新不如舊?新一代唔比舊時差

成日講「以前睇嘅德國隊」嗰啲,怕且都有一定波齡,但同時間,亦限制咗自己視野。

「阿叔細個睇奇連士文幾勁幾勁呀!」
「如果有馬圖斯喺度點會咁咁咁……」

老人家梗係覺得以前啲球員出神入化,但有冇諗過,世界係進步緊?而家足球科學化咗幾多?而家球員體能又強咗幾多?跑動多咗幾多?冇得如果,但我幾相信,而家嘅頂尖球隊,好過你「舊屎」睇果啲。你估而家告魯夫落場仲可唔可以半場煲煙?

德國唔見得新不如舊。證據?講過啦,2014 年德國 Elo Rating,史上最強。唔知係乜?咁就真係證明你應該睇多啲我嘅文。我都唔鍾意路維,但計歷任德國教練,佢得勝率最高。連續 5 屆大賽入四強,唔好話德國史上,我諗全歐洲都搵冇咁嘅隊伍。世界盃都捧埋,都仲要比你話冇領袖冇鬥心,真係難服侍。

路維連世界盃都捧埋,都仲要比你話冇領袖冇鬥心,真係難服侍。(Getty Images)

話而家啲球員「冇鬥心」,有啲道理。而家球會人工咁高,賽事又重要,真係唔係咁多球員大賽出局喊晒口。但呢個唔係德國獨有。美斯 2014 年世界杯決賽輸波都係冇乜嘢。今日千夫所指嘅小豬,當年比人踢到飛起,十分熱血。卻奧斯今屆出局後一樣捉住球證係咁鬧。有火無火,不能咁表面。

【01博客咁睇波】比馬會更準的估波必勝法

冇領袖?係唔要球霸

再講「冇領袖」。首先,乜水叫領袖?「收山腳」高拿都算?而家球例下佢會食幾多次紅牌?又不如講下佢臨收山嗰場,30 分鐘見紅,累到多蒙特大熱倒灶捧唔到盃?領袖?「殺人王」舒密加都有人提?唔好話在法國,在德國佢都神憎鬼厭。自己搵書睇佢所作所為。領袖?希士拿?唔係嘛,邊忽領袖?梅迪薩卡都有人講?不如去搵個德國的足球專家(唔係香港嗰啲)講下,我介紹又點話?

「收山腳」高拿(黃衫多蒙特球衣者)都算領袖?而家球例下佢會食幾多次紅牌?(Getty Images)

正常啲嘅,馬圖斯、碧根鮑華、鋼門簡尼、波歷克之類。呢堆都係國家隊隊長,人人同意係領袖。咁呢班領袖有乜共通點?如果講經驗資歷,咁唔使多講,小豬出戰大賽次數,史上全歐洲最多。普度斯基 130 cap 都嚟緊添。但好似冇人叫佢地領袖。

OK,其實係講領導力,感染力。有啲抽象。但我大約明。即係馬圖斯簡尼波歷克呢啲,有霸氣嘛,「壓到場」,又識得喝隊友。但,紐亞都壓到場,對手都話射十二碼對住佢,個框都變細咗,但紐亞佢唔多鬧人。馬圖斯簡尼波歷克之類,場內場外都性格鮮明。世界圍住佢轉。即係乜? 即係「大佬」。又名「球霸」。

有冇諗過,路維就係唔要呢種大佬文化? 在我心目中,波歷克係德國近 N 年(冇 40 年都廿年)個人能力最強嘅球員。但,佢在國家隊亦出名霸道。2010年德國只拎第三,但奧斯爾基迪拉梅拿等等新人受盡好評。路維之後都冇再召波歷克,兩人就咁反面。然後 2012 年外圍賽德國十戰十勝。冇大佬又點?之後一樣屆屆入四強。掉返轉頭,波歷克簡尼咁「領袖」,有冇盃捧?有領袖冇盃捧,冇領袖有盃捧,到底「領袖」有幾重要?

壓到場?紐亞都壓到場,對手都話射十二碼對住佢,個框都變細咗。(Getty Images)

德國隊嘅「領袖」,往往搞事。「以前德國隊好團結」係假象。德國隊二戰後最樣衰,一定係 2000 年歐國盃。輸波出局事小,搞到內亂事大。球員想架空教練,聽「領袖」指揮,德國隊居然有咁嘅事。邊位「領袖」?之唔係 40 歲踢 MLS(美國職業足球大聯盟)都仲要喺德國做大佬嘅馬圖斯,仲有 34 歲嘅希士拿。1998 年八強比克羅地亞踢出局,一樣係佢兩位領袖。唔見阿領袖帶領德國好有鬥心反勝?有,馬圖斯賽後話早知德國當年唔應該支持克羅地亞獨立,而家都仲比人笑緊。唔止,1994 年八強輸比保加利亞又係佢兩位領袖。哈,1996 年,馬圖斯冇入選(同奇連士文唔妥,說好了的德國好團結),希士拿唔係主力,就有盃捧啦。

領袖?教練咪領袖,唔係要球霸。比利時今屆就個個都領袖,索性唔聽教練韋莫斯支笛,雷聲大雨點小八強出局。2010 年法國隊一樣係咁內亂,仲話罷踢,提早出局。

唔好選擇性失憶 數據唔會呃人

至於話德國隊而家落後唔識踢,亦係一個謬誤。講出嚟好似好廢,但落後就係好難踢,特別係玩馬騮搶波玩到化境嘅西班牙,幾屆食住德國。有冇諗過,而家德國「唔識反勝」,因為根本好少落後?

2000年歐國盃,德國隊球員想架空教練,聽「領袖」指揮,邊位「領袖」?之唔係40歲踢MLS都仲要喺德國做大佬嘅馬圖斯。(Getty Images)

拿姆小豬年代(2010-2016),4 屆大賽,落後過 6 次。之前簡尼波歷克 4 屆(2002-2008),落後過 7 次。8 屆加埋 13 次。好有領袖好有鬥心嘅,三劍俠年代(1988-2000),7 屆,落後過 15 次!識計數呀可?

唔好忘記,以前歐國盃踢少幾場的。咁而家少落後,當然少反勝。而講真,1998 年對南斯拉夫都要符碌省中人追平,對墨西哥都要先落後再反勝,你覺得好「德國」?我覺得好悲哀。

1982-1992 年間,意大利在大賽從冇落後下追和,更冇反勝。唔通當年意大利又冇鬥心?係因為根本冇乜落後。同樣地,西班牙 2008 捧盃到而家,落後下只係反勝過一次,追平過一次。點解?因為根本好少落後。

拿姆(右)小豬(左)年代(2010-2016),4 屆大賽,落後過 6 次。少落後,當然少反勝。(Getty Images)

而家德國唔識反勝?哈哈啦!幫你計埋數,只計大賽,拿姆小豬年代,反勝率 17%。簡尼波歷克年代,反勝率 14%。 至於三劍俠年代?反勝率得嗰 13%。邊個年代德國更識反勝?咁選擇性拎你記得嘅波出嚟講,唔記得保加利亞克羅地亞甚至 1988、1992 年對荷蘭之類,就梗係得。

我話你知,德國 1990 年捧盃,一分鐘都冇落後過。2014 年再捧世界盃,亦只係分組賽落後咗 10 分鐘。講到 1982 或 1986 有領袖識反勝點勁,咁冇盃捧吖嘛!對,1996 就真反勝,但淘汰賽出咗 20 分鐘嘅比亞荷夫係「領袖」?更唔好講好多屆有「領袖」都樣衰出局。

而我好期待有人話我知,當晚如果法國捧盃到底你會話邊個係領袖。See?捧咗盃就個個都係領袖。睇有冇人話洛里斯皮耶基沙文係領袖先。

又,2014 年法國落後德國足足 80 分鐘都追唔返,說好了的領袖呢?

(本文純屬作者意見,不代表香港01立場。)