阮兆祥愛情長跑18年：不為滿足別人而表演結婚
撰文：冼燕珊
出版：更新：
呢排成日見到嘅阮兆祥，今日出席TVB劇集《性在有情》宣傳活動，祥仔同女朋友Crystal愛情長跑踏入第十八年，每逢新年，佢最驚長輩問佢：「幾時結婚呀？」佢解釋點解咁多年都唔結婚：「唔想因為其他人嘅期望而去結婚，我唔會為咗滿足其他人而去結一次婚俾人睇，結咗婚係咪會令兩個人覺得幸福咗呢？我又覺得唔會，呢18年嚟，我同女朋友關係好穩定，反而見到身邊好多人結咗婚好快又離婚，都無人嘅關係長過我哋。」
祥仔同女朋友拍拖踏入第18年，佢話比好多結咗婚嘅人關係更長久。（江智騫攝）
祥仔新年最驚俾人問幾時結婚。（江智騫攝）
祥仔在現實生活中有穩定嘅另一半，但在劇集《平安谷之詭谷傳說》中卻只可以暗戀三太太顧曼儀（朱晨麗飾），最近劇情逐步暗示綁架小璇嘅人原來係佢飾演嘅陸家管家伍尚舜，點解佢要咁做呢? 祥仔露少少口風話:「原本平安谷有兩大家族，伍家同陸家，伍家本來坐大，但家道中落，伍尚舜淪為陸家管家，佢所做嘅一切，其實係為咗重振家業。」
祥仔透露他在《平安谷之詭谷傳說》中飾演的伍尚舜，他綁架小璇是因為想重振家業。（江智騫攝）