中年好聲音3|趙浚承稱與陳靜屬puppy love 激動落閘:唔會回憶

撰文:林迅景
出版:更新:

《中年好聲音3》決賽將於星期日晚(11日)舉行,七強之一的趙浚承近日成為討論話題。趙浚承被爆曾與DaDa陳靜拍拖,更有被指有親密照流出。同「女神」拍過拖,除了令人好奇之外,當然還羨慕不已。今日(10/5)他在啟德體藝館做採排時,就對昔日戀情有以下回應。

《中年好聲音3》決賽七強,趙浚承。
《中年好聲音3》決賽七強,趙浚承。

趙浚承說:「日日都有,真係嚇死我。(其實大家都知?)係呀,但係有講過同埋冇講過畀老婆知係爭好遠,好彩我係有講過。如果佢睇到報紙咁講先,我就大鑊啦!」他表示這段昔日戀情一早已向太太備案。他又續說,表示當時拍拖只是「puppy love」。「我哋嗰啲係Puppy Love,好細個一齊。唔會回憶㗎,我而家腦入面只有我太太,唔會回憶呢啲嘢。(果然係已婚男人)我哋好有求生慾!」

趙浚承表示不想第一個人出場,唯有揀做第二位出場。(林迅景 攝)
陳靜Dada。(陳靜IG影片截圖)

趙浚承由100強打入七強,一直都有聲音指他靠關係入圍,明星足球隊是他的「靠山」。趙浚承嘆了一口氣,回答:「我喺明星足球隊真係好耐,08年已經跟佢哋踢波,有一段時間亦都簽過校長(譚詠麟)公司,5年前嘅事。」他表示,譚校長對他來說是一個亦師亦友的前輩,帶他登台表演,也教他唱歌和舞台技巧。「喺呢個比賽入面,佢見到我嘅時候有鼓勵我,但係後面有冇講啲乜嘢呢,就真係冇,因為佢都唔想俾咁多壓力我。佢淨係同我講:『加油!』咁。」

趙浚承坦誠與陳靜DaDa拍過拖,但當年只是puppy love。(林迅景 攝)
趙浚承奪MVP。

他又表示,自己在明星足球隊中只屬於「佢都係踢波嘅」的小人物,雖然同隊,但與曾志偉和叻哥陳百祥這些前輩並不熟悉。「好少好少,都係咁啱踢波嘅時候先有會見到。好坦白講,08年出道,我喺娛樂圈都係一個透明人,未必知道有我嘅存在。啲大哥們,可能連我個名都噏唔出。(如果真係咁熟,未必要等《中年好聲音3》先捧?)係呀,冇錯。如果真係幫,我中間嗰幾年就唔會咁掙扎啦,內心諗仲要唔要繼續,個過程其實好辛苦。」

趙浚承相當多新聞。(林迅景 攝)
大合照(左起):占士丁丁、張與辰、黃博、許濤、陳芷盈、李金凱、劉洋、趙浚承