【有量又有質】捷克嘅AV點解咁巴閉

小弟熱愛東歐，當然去過捷克。
我人生第一次旅行就係去捷克，時為2000年，同啲鬼仔鬼妹一齊瞓平價旅舍，幾十蚊港紙，一房四五十人，十幾張上中下三格嘅碌架床。
當年雖然係窮學生，但「東歐巴黎」布拉格（Prague）嘅華麗深深咁震憾咗大鄉里嘅我。

後來歐盟東擴，捷克2004年加入，之後愈嚟愈多遊客，香港都好多人去過，我都有再去。去捷克嘅梗會去布拉格，舊城區，查理大橋，布拉格城堡，周圍都係教堂同廣場，好似時光倒流咁。講出嚟可能政治不正確，但正貨巴黎一街有色人種，反而「東歐巴黎」見到嘅多數係斯拉夫俊男美女，仍然滿足到你對傳統歐洲嘅想像。唔怪得不少朋友都在布拉格影緍紗相。

不過，Stephy話齋，一切都係掩眼法，你睇到嘅未必係真，真嘅你又未必睇到。有冇諗過，一街教堂，已經冇乜本地人去？幫你影相嘅攝影師，可能兼職甚至正職係拍成人電影（AV）？一街嘅靚仔靚女，可能若干年後你上網睇AV會見到？

對，古典浪漫嘅捷克，同時亦都係AV大國。夠晒估你唔到。

本文其實想探討「點解捷克會係AV大國」，但如果你根本唔同意我提出嘅觀察，咁實在冇得討論落去。讀者可能十分純潔唔睇AV，或者只愛東洋餐唔愛西餐，又可能係「睇就睇啦理得佢捷克定慕尼黑」。無論係咩原因，如果唔知道嘅，首先本人話你知，捷克嘅AV有幾巴閉。

上次寫《錢買唔到嘅嘢，更多錢可以解決》，朋友話「你應該講捷克AV嘛」。 對，有個系列叫做Czech Street。宣傳語句係 “Czech girls are ready to do absolutely anything for money”。周街搵路人拍（當然唔係真正路人），唔肯嘅，攝製隊會派錢，「更多錢就可以解決」。諸如此類嘅 Czech 乜乜 Czech 物物系列仲有好多，睇開西片嘅，應該會有印象。 

咁有讀者唔睇西片或唔睇AV嘅又點？唔緊要，用數字答你。捷克實在出產好多AV女演員 （其實男嘅都係，但本人係直男，暫不討論）。有幾多？其實唔易統計，有啲可能退左役唔知計唔計，又有啲雙重國藉或轉國藉，亦有根本係報假資料，捷克女仔扮俄妹又有，羅馬尼亞扮捷克亦有。而雖然AV都有類似 IMDB嘅資料庫，但當然唔全面，亦都往往只集中在西片。閣下有更準確嘅資料的話，歡迎補充或挑戰。

唔好忘記，捷克先得嗰1000萬人口。日本係1.3億，美國係3.2億。計及人口，捷克肯定係AV大國。在美國日本兩個大國外，話捷克穩坐第三把交椅，應該冇乜人反對啦？ 

舉多個例子，希望令睇開日本AV嘅本地人信服。唔知幾時開始，部份日本AV開始玩和風洋食，有金髮女演員同日本仔做對手戲。其中一個最出名女演員嘅就係 Abigaile Johnson。佢在戲中當然可以扮演不同地方嘅人，但話你知，佢係嚟自捷克嘅。 

睇到呢度，信服咗捷克真係AV大國後，問題就係，點解？ 

最常見嘅答案係：捷克女仔靚。其實唔係一個好答案。對，捷克女仔可能靚，但拍AV同靚唔靚有冇好必然嘅關係？就當有都好，烏克蘭女仔公認靚，韓國女仔都靚，委內瑞拉專出選美冠軍，但總唔見佢地及得上捷克？

第二個常見答案係：捷克人窮，要出賣色相。其實諗真啲都知唔係，計人均GDP，捷克全世界排頭40。只計歐洲都好，捷克人均GDP都仲比平均數高。 而捷克失業率4%唔夠，差不多全歐洲最低，頂多得瑞士冰島可比。講窮，大把歐洲國家更窮。

人均GDP睇落OK但分佈不均貧富懸殊所以要搵快錢？ 又錯！捷克嘅堅尼系數，0.26，差不多全世界最低。數字當然可能有水份，但點睇貧富不均都唔係主要原因。

本人睇過唔少文章，較為可信嘅理由係：社會風氣。對，捷克係一個相當「開放」嘅社會。例如捷克對LGBT相當包容，早在1962年同性性行為已經合法， 比西歐嘅「先進國家」英國德國仲要早。Pew Research Center 2013年做過個調查，捷克人似乎相當前衞（亦即係冇乜道德枷鎖），對婚外情，婚前性行為，同性戀，墮胎等等事情嘅接受程度，差不多係全球最高。 

記唔記得本文開頭講冇乜捷克人去教堂？包容開放嘅另一面，相信因為而家捷克大半數人口冇宗教信仰，比例差不多係全世界最高。四周嘅教堂，而家主要搞音樂會搵遊客錢。

捷克人點解普遍冇宗教信仰？ 有話係因為二戰大戰時教會助紂為虐，做納粹德國傀儡。有話係因為原本信基督教後來又比人迫信天主教最後兩個都唔信。亦有話同「民族性」有關，波希米亞主義（Bohemianism）講不受傳統束縛，無視世俗眼光。波希米亞係乜？政治不正確但簡單地講，波希米亞就係捷克。儘管其實「波希米亞主義」 起源係法國佬見到捷克嚟嘅吉卜賽人流浪又唔沖涼。

真的，捷克語根本冇「波希米亞」呢個字，就咁叫做Čechy，同「捷克」同一個字。捷克國寶，作家米蘭昆特拉（Milan Kundera），在小說堅持唔用「捷克斯洛伐克Czechoslovakia」呢個詞，覺得冇歷史感，唔靚，只用「波希米亞」。 

無論如何，捷克人冇乜宗教信仰，係事實，AV業強大，都係事實。同鄰國波蘭濃厚嘅天主教氣氛實在好唔同 （九成波蘭人信天主教， 前任教宗若望·保祿二世正係波蘭人，而波蘭墮胎法相當嚴苛）。懶理傳統禮教嘅波希米亞人， 唔去教堂，走去拍AV。聽落，又好似唔係想像中咁荒謬吧？下次再有機會去捷克， 不妨睇真啲，睇下教堂入面係咩人。

（文章純屬作者意見，不代表香港01立場。）