【來稿】一個屯門人的獨白：搭唔到的士，索性去考的士牌

文：米老師

我考了車牌，剛過了P牌期，遲d諗住考的士牌。

我有諗過揸uber，不過諗諗下，都係揸的士好d，在一個發牌有限的環境下，的士行業始終保障大一d，而且用石油氣，平都平d，如果有錢買埋個牌返黎，仲可以揸風流車等佢升值或者自己揸唔到，俾人揸。

我係一名中學教師，家住屯門，教於屯門，看似不受交通困擾，實情係，日做十二個鐘，有時放工，去見下朋友，可以用哪些交通工具呢？乘搭西鐵、巴士要轉幾次車，去到九龍最少都要1個鐘，未計香港gathering地點多而又多，加上回程車時間，難道仲好似中學時代去開都係旺角幾個大商場咁點對點，而且無限精力可以夜訓早起power up？

如果揸車，我自問就擔心放工後既狀態同食左安眠藥一樣，而且，屋企樓下停車場要排三年，唔駛排既爛地場要行十至十五分鐘，揸到出去，搵停車場又難，費用又唔平，所以，我平時出去，都會call 的士：

不揸車免害人
不搭大型交通工具換片刻寧靜養神

可惜的是，作為一個屯門人，一定會試過，call的士要加「小費」先有車返屯門，或者唔call直接上車，俾人叫返落車既經驗。通常，我都明白要師傅入一次屯門，無客出九龍又真係幾慘，所以大部份時間我都好有禮咁落返車，再等過，少部份時間黑佢地面，記低佢地車牌，諗住投訴佢地，不過呢件事無發生過。

又有既經驗係，入屯門變為生死時速9，司機有一段路開到130km／h，我感受到咩叫「頭搖又尾擺」，我講係我呢個已經繫上安全帶的乘客，我既片刻休息變為禱告時刻，感謝主，仍健在﹗

睇完蔡東豪先生一篇「忙到無朋友」既文章 ，我深深嘆息，係香港除左工作既忙碌、不同人士對老師既期望愈來愈高、甚至，今日連我想換取丁點時間既共享經濟新方式，都難以發生。

所以，我諗到既係，要唔俾交通工具欺壓既最好方法，就係成為最大聲既其中一個持份者，俾佢地同化，享受建制帶來既利益。如果俾我揀揸車搵食，我一定揸的士（如果我考到個的士牌的話），不過，這些機會不是屬於我的！

有人話，uber問題多，從法律、大企業的抽佣方式上來說，我認同有許多要討論、優化、監管的問題須處理；從乘客角度，牽涉的法律責任及質素問題，或者都有，但作為一個專業既乘客，一年搭的士無一百都有八十次，uber最少都有三四十次，月均兩者夾埋既交通費＄2500左右。從經驗來說，對於一個平凡像我的人來說，uber是一帖止痛藥：它不能改變社會上一些核心問題，但至少，它在權力圍牆上鑽了一個透氣小洞，讓弱者看到被政府、壟斷市場欺壓至近乎絕望的前方，窺探到社會發展的一些可能性。

對於更多未能付上的士及uber的費用的偏遠市民，今天他們要默默忍受著交通系統滯後帶來的附加時間成本、有增無減供樓租屋的壓力、工作就業欠標準工時的保障、遲遲未落實的全民退保等等，凡此種種衍生出的劣質家庭時間及問題、人倫關係的疏離以致不斷增加的情緒病個案，比起uber是否合法，這些更值得討論、回應，無奈此關乎民生的大是大非的討論及政策迄今仍乏善足陳。

在屯門青山遠望，可見一條天價港珠澳大橋、一條將會完成的第三跑道；有時尖沙咀塞車時，我總見到一個雄偉的建築地盤，就是未來十年我都應該搭唔到一次既高鐵。我想，她們是不是香港高官權貴們一直所仰望的圖騰？若是，請原諒我們為到uber合不合法、那些政策如何執行等等一直絮絮不休，干犯你們的神聖膜拜時光，願你們那圖騰之神保護你們，可以救你們脫離我們那「你快樂過生活，我拚命去生存」的草基心聲﹗不過，善惡到頭終有報﹗你們圖騰所指向的神明，在公義面前，總有倒下的一天﹗我仍是相信的！

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）