【有片】張家輝內地廣告爆紅 世界級國語同古天樂有得揮？
撰文：洪曉璇
出版：更新：
廣東國語代表人物，點可以唔提古天樂。（影片截圖）
要北望神州搵真銀，第一件事點都要識「煲冬瓜」學國語。年輕一代香港藝人，讀書時已經有普通話科，國語溝通基本上無咩問題，不過年長少少四五十歲嘅藝人就要自己努力學習啦。張家輝喺內地代言網絡遊戲，廣告中一句：「大家好，我是渣渣輝...」被瘋傳，廣東國語界最出名嘅古天樂終於有勁敵啦！
張家輝代言呢個廣告喺內地爆紅。（網上圖片）
講起世界級普通話，香港代表大家第一時間通常都諗起古天樂，無辦法啦，佢嘅「想節能輪胎能」實在太過深入民心。最近佢終於有勁敵啦！早前一個內地網絡遊戲廣告中，一句：「大家好，我是渣渣輝...」成功攻上熱搜榜迅速爆紅，而呢位「渣渣輝」正正就係我地嘅影帝張家輝！乜自己個名都講得咁有特色呀……
張家輝經常返內地工作，即使喺香港亦無可避免要做內地傳媒訪問。（資料圖片）
聽到「渣渣輝」三個字，劉青雲已經笑到企唔穩。（影片截圖）
早兩日家輝出席香港影視博覽活動時，有內地傳媒乘機問起佢點睇網友瘋傳摹倣佢嘅國語，家輝話：「大家好，我……」雖然最終無即席自我介紹，不過企喺旁邊嘅林嘉欣同劉青雲笑到停唔到，家輝有點尷尬笑言：「關於借（這）一點，我承認不是母語嘛...你們應該原浪（諒）我們，已經很努力了。」其實大家都睇得出你盡咗力架啦，不過笑呢樣嘢又真係好難忍嘅。有網友搵出一段古仔同家輝國語訪問片段比較，大家又覺得邊個出色啲呢？