周柏豪今日（10/2）現身香港電台廣播大廈出席《香港電台乙已蛇年新春團拜》。講到拜年，周柏豪接受《香港01》訪問時表示：「今個新年暫時未去藝人朋友屋企拜年，因為近排都話流感都好嚴重，變咗稍後嘅時間都會去見佢哋，不過今個禮拜公司都會有團拜嘅，但我都會盡可能做足安全措施，例如會戴口罩，同埋都避免去人多嘅地方。」

講到防疫意識，周柏豪就透露不及囝囝醒目：「其實佢哋學校都教得好好，佢哋洗手都會做得好足，同埋我係會俾個囝鬧返我轉頭，就好似最近佢啱啱學校牙科保健，就教咗佢哋學正規刷牙嘅方法，點知有一日佢見到我刷牙嘅步驟同佢唔同，佢係喊晒口鬧我『唔係咁刷牙㗎』，然後我問佢點樣刷，佢就示範俾我睇係點樣刷。到最後我唯有跟返佢嘅步驟去做。小朋友比較單一啲，佢就會覺得佢嗰樣就係啱晒，咁所以我就唯有配合佢，就係咁我學識咗刷牙，原來咁多年嚟我係錯嘅，哈哈！」