【超時空男臣】 黃翠如身家暴漲 蕭正楠唔恨做千億女婿:一笑置之
暑假話咁快就已經過咗一半，由蕭正楠(Edwin)及曹永廉主演嘅劇集《超時空男臣》亦好快進入尾聲，當中Edwin同女友黃翠如近日被網友拍到到英國旅遊，唔同早前盛傳他們會趁今個月旅遊結婚？Edwin與阿廉接受《香港01》專訪時，亦有提到此事，Edwin就話透露自己性格好隨心，「閃婚真係唔奇，我同翠如都係隨心嘅人，有mood到就做。」
攝影：黃國立
服裝：Mino Maestrelli(蕭正楠)
每隔一段時間，就會傳出Edwin會同女友黃翠如拉埋天窗，佢對於結婚一事就話，「該發生嘅時候就會發生，你問幾時我真係答你唔到。我同翠如都係隨心嘅人，有mood到就做。當然都會羨慕好似阿廉咁，一返到屋企就見到一班仔女。」咁有無計畫自己會生幾多嗰小朋友？Edwin就話小朋友要黎就黎，「但我覺得我係會生好多嘅人，因為我細個爸爸俾好多父愛我，我都覺得某個年齡都會將呢份愛share俾我小朋友。」
提到去年女友黃翠如爸爸所創建的聯旺集團上市，有指翠如身家一夜之間暴升為「38.5億千金」，身為其男友嘅Edwin亦被傳媒冠上一個「千億女婿」嘅稱號，他聞言後就話，「一笑置之，如果大家咁天真覺得呢啲嘢係咁易嘅世界，咪繼續相信咯。而我依然謹守自己崗位，對我係0影響，我依然繼續搏殺事業，如果同翠如有家庭嘅話，咪繼續奮鬥。」但他與翠如嘅爸爸關係亦不錯，有時都會向對方請教投資方法，「我都知佢daddy有物業投資買賣經驗，其實我都再揾大一啲嘅單位住，無論係自己或者將來住，都有問uncle有咩心得。」
但現實中，原來Edwin已經成為飲食界才俊，去年於牛頭角開漢堡包店，生意口碑都不錯搞得有聲有色。問到香港有咁多唔同美食，點解會想佔一席位？Edwin就話係與表弟們嘅一個年少時嘅承諾，「因為我地小時候在日本料理打暑期工，嗰陣就幻想幾時會有自己嘅鋪呢？去到上年，表弟就話有時間可以搞，諗左好耐究竟開咩好呢？叮一聲就諗到漢堡包，因為翠如鍾意食漢堡包。」而今年5月仲係藍田開分店，Edwin都大讚表弟做生意做得有板有眼，「之後可能都會揀係九龍東地區開，因為人流多，二來有很多公司同事都話牛頭角有些唔方便，所以之後都會考慮在將軍澳開，可以做埋外賣生意入TVB。」
講返今次同阿廉《超時空男臣》已是第五次合作，Edwin都話係第一次與對方對足4個月，「今次真係日日見，其實我同佢私底下好老友。有時佢係微博鬧人口不擇言，我都會幫佢道歉解釋或者鬧佢。」阿廉聽完之後都即刻反擊並笑言，「佢有時唔知頭唔知路，又叉隻腳埋黎。」記者以為佢地咁friend起碼認識超過10年，但原來真正只不過是5年，阿廉說，「其實我地係2012年拍攝《大太監》認識，因為拍完後私底下都有聯絡，而且都有好多劇集合作，所以友情建立得好快。其實我係TVB都有好多朋友架，唔係得佢！」Edwin都話對方係自己朋友圈裏數一數二，「佢真係我好少又私底下都咁friend嘅人，連翠如同佢都好close，因為我嗰心就好難開,但認識阿廉之後一見到佢，就忍唔住串下佢。而且佢好肯幫人，尤其是嗰袋準備好多野乜都有。」Edwin講到咁，應該都係對方身上學到唔少嘢？他笑言，「咁就唔好喇，唔學人生應該會好啲。」