曹永廉喊住口入TVB為還錢　感激邵美琪帶出騷清卡數：剪剩一張卡

喺《超時空男臣》演左光斗嘅曹永廉今日接受商台《1圈圈》訪問，講起佢入行23年辛酸史，初初做歌手已欠落週身卡數，走投無路加入TVB，奈何TVB月薪得幾千蚊，曹永廉忍唔住感觸落淚，最後幫佢還清卡數嘅竟然係邵美琪。

新一代觀眾可能只知道曹永廉係電視演員，以每年手執4、5套劇嘅阿廉嚟講的確算係多產演員，但好多人都唔知其實阿廉出道時係一位歌手，而且遭遇都幾坎坷。

曹永廉接受梁泰來訪問時講到會否想再做歌手：「唔敢諗，我94年出咗3張碟，兩年就冇再出，唱片公司蝕到瞓喺度；02年啱啱出完《妙手仁心》可能人氣好好，就出咗一隻都係唔賣得嘅！」因為好不幸地，阿廉做歌手年代正值翻版CD猖獗，唱歌根本賺唔到錢。

曹永廉入行前做過行街、快餐店、賣童裝、清潔工人、甚至胸圍售貨員，後來參加歌唱比賽入行，但頭兩年只能夠做歌手助理，曹永廉說：「冇收入，只靠積蓄，經理人有搵我做job係得少少，自己就碌卡，捱咗幾年至出碟。」一味靠碌卡令佢當時欠落幾十萬卡數：「等待（做歌手）過程好辛苦，錢銀係好大問題，咁大個仔問屋企攞錢好唔舒服，唯一當係了解幕後嘢囉。」佢又話人工只夠還息，唯有考慮轉工，99年經理人介紹佢入TVB：「入去係因為出面真係唔好，有諗過唔做娛樂圈，但唔做做乜呢？有人勸我咁樣只會越做越跌，於是搵人介紹我入TVB，經理人話人工得幾千，我就喺電話度喊，少到好少，打工點都有一萬吖，我冇諗過咁嘅錢（人工），同經理人一路講一路喊，但冇辦法啦！」

阿廉加入TVB最初係做旅遊節目，因為呢類節目比較容易令觀眾了解佢性格，後來有監製搵佢拍劇，好好彩第一套《雙面伊人》佢係第二男主角，觀眾開始注意佢，但佢話最大恩人係邵美琪：「邵美琪幫我一齊做騷，（佢唔鍾意登台個喎），係呀，為咗我，出多幾次，年幾就還咗啲債，剪剩一張卡，慢慢就多啲嘢做喇！」之後佢越怕越多產，登台亦越做越旺，至唔再有經濟煩惱。