梁家輝以剪綵嘉賓身份攜同太太江嘉年以及孖女大孖梁穎晨 (Chloe) 出席車行開幕活動，原來今次是家輝首次擔任剪綵嘉賓，他力撐年輕人創業表示：「車行其中一個老闆是我世侄，這次他和朋友一起創業，香港創業不容易，寸金尺土，租金真的好貴，他們將愛車的興趣發展成事業，仲自己創業，努力闖出一片天，好值得鼓勵。（仗義剪綵？）我哋唔講錢，我來撐他們。」至於可會鼓勵他的女兒創業，家輝說：「女仔唔使創業，而是要創造自己的家庭，我為人很傳統，唔止古板，直情係很古老，我認為女仔最終都是要找個好歸宿，擁有一個幸福的家，全心照顧屋企人和湊小朋友，等丈夫可以無後顧之憂，放心喺出面打拼。所以做女仔唔使諗咁多，最緊要有自己的家庭。（催囡囡結婚？）不是催她們，只不過想講女仔最終都要嫁人相夫教子，最緊要找到相愛的人。」

對於大女Chloe早前拍廣告，家輝笑言：「咁個女未嫁人都要工作，唔可以做大食懶，拍廣告幾好吖，她喜歡就好。（Chloe想入行？）她沒有跟我說她要入行，拍廣告是因為要幫朋友，都要讓她試過才知道是否適合，先知自己得唔得。（你不反對她入行？）我咩都唔會反對，條路是她自己的，她有權去選擇想怎樣行。」至於工作方面，家輝表示近期忙於在拍攝由麥浚龍執導的電影《風林火山》，他謂不可以透露戲中的爛面造型，又指自己在戲中會殺死所有人。