【多圖】王棠云瞞經理人墨爾本嫁余文樂 彭于晏分享婚禮照片
余文樂同彭于晏呢對相識十多年嘅好兄弟,係圈中出名嘅鑽石王老五。樂仔率先結束單身,同王棠云步入人生新階段,Eddie都好有心思咁以P圖祝福 --- 將自己個樣KEY上新娘子個頭,網友大讚有創意,亦笑問「男閨密係咪想搶新郎?」其實Eddie又點止發微博,佢排開工作行程親赴墨爾本參與婚禮。不過原來新娘子王棠云係瞞住經理人公司出嫁﹗
2002年合作偶像劇《愛情白皮書》就成為好友,15年以來多次合作,在公在私都係最佳拍檔。2009年彭于晏同經理人公司發生糾紛時,亦係樂仔主動幫忙牽線,令Eddie可以到香港發展。樂仔結婚又點少得呢位好兄弟呢?Eddie喺微博上載一張,將自己個樣KEY上新娘子個頭嘅婚照,非常爆笑。另外喺IG上載十張照片,包括佢同新郎哥嘅合照,可以見到樂仔笑得非常燦爛,而Eddie就咀扁扁欲哭無淚。
另外Eddie亦分享咗幾張疑似一對新人喺婚禮前嘅相片,一張係樂仔著住灰色馬甲西褲,坐喺度望住門外,就好似等緊自己嘅新娘出現;另外三張係身穿便服嘅相片,余生余太目光一致,洋溢幸福感覺。樂仔亦喺婚禮翌日上載多張婚禮上,同兄弟姐妹嘅合照。
【港女講感情】余文樂王棠云拍拖一年閃電結婚 Timing真係好重要
余文樂老婆王棠云仲係億萬公主? 家族企業曾負債要拍賣豪宅填數
新娘子王棠云亦喺IG分享喜悅,並透露婚禮原來係樂仔一手一腳準備:「過了一半的青春,我想我遇到了生命中對的人了,一個值得把我的幸福交給他的男人!最簡單的幸福就是和你一起快樂的每一天,謝謝你帶給我的幸福和安全感,也謝謝你準備的這一切一切,給了我這麼夢幻的一天」,不過原來佢嘅經理人公司並唔知道佢要去結婚,佢嘅經紀人聽到消息都話嚇一跳:「她沒跟我們說耶,只跟我們說要和余文樂去工作。」王棠云向公司請假十幾日,預計呢對新婚夫婦會喺墨爾本甜蜜度過聖誕節。