無綫50周年台慶重頭劇《溏心風暴3》今晚播出第8集，關菊英和莊思敏的八婆戲繼續上演，不過好彩今集戲份不多，好快就嘈完。今集劇情反而多講一些感情線，分別有王浩信同岑麗香呢對現代版羅密歐與茱麗葉，仲有講唐文龍同陳敏之呢對，今晚可以說是陳敏之對唐文龍改觀，更暗生情素的一集，為兩人的一段孽緣埋下了伏線。

以下含少量劇透，逃生門在此

陳敏之之前因為聽老友講唐文龍壞人就以為對方是衰人，原來只是一場誤會，唐文龍其實是個大好人，敏之才頓覺自己錯怪了對方。其實唐文龍這個角色設定相當討好，雖然已經有老婆同囡囡，但依然迷倒不少女生，而敏之於今集亦開始中招。事緣講述敏之晚上上完唐文龍的課堂後，在便利店買完嘢發現自己遺失了一隻重要的USB。

此時剛巧被駕車經過的唐文龍遇到，唐文龍二話不說即刻話要幫敏之手搵，仲不介意扒地兼摷垃圾，整到件衫污糟晒，之後他仲和敏之一起回學校再搵過，極度Gentleman！最後敏之在學校廁所搵返隻USB，唐文龍就送她返屋企。駕車途中唐文龍仲請敏之食原本買給囡囡的咖哩魚旦，敏之都好識做咁餵了唐文龍食。最後敏之返屋企前跟唐文龍拜拜，個樣已經冧爆，就知道她經已中招了。