近期睇《溏心風暴３》，最入肉就是唐文龍的婚外情被公開。當夏雨知道自己個女陳敏之做人小三，便忍不住當眾鬧爆唐文龍，兼且再置入式廣告地潑奶茶在對方身上，呢場戲都算爆。不過，身為小三的陳敏之，被人發現自己勾引別人老公之後，不但沒有收手，而且完全沉晒船。為了與唐文龍一齊，連家人的名聲都不顧，好聽叫愛情大過天，難聽點就是被愛情沖昏了頭腦，失去理智。

當唐文龍被發現偷食之後，自願不賠錢地被炒，然後與陳敏之偷偷會面。誰知道女方一開口問完點解辭職，其後就是不顧一切，揚言願意貼錢給唐文龍的老婆仔女，再同情人遠走高飛。聽到呢句對白當堂打個突！破壞人家庭都算，男方因為自己而身敗名裂，仲冇咗份工，竟然仲一心諗住私奔，到底佢有冇諗過男方感受？唐文龍失業，仲要諗點樣同老婆交代，轉個頭你就話要遠走高飛，聽到心都煩埋…所以唐文龍都話過幾日先搵佢，咁都合理呀，只係女方太以自己着想囉。

咁都未算，當成家人都諗緊呢件事點樣拆，點樣冚先至冇咁核突，然後公司繼續正常運作，而作為阿媽嘅李司棋都苦口婆心，諗住用懷柔嘅手法去勸陳敏之唔好再錯落去。之但係陳敏之完全聽唔入耳，亦都冇諗過點樣收拾殘局，講都唔講聲就衝入會議室，同人講係自己勾引人老公，聽落好似好偉大，人哋冇唔啱！你要怪就怪我喇！但係其他人唔係咁諗吖嘛！講完就可以冇事發生咩？仲有家醜不出外傳，當其他人都喺度仲大大聲講：「係我勾引佢㗎！」呢個小三真係好不智，為咗自己利益，連屋企人感受都唔顧，到底係咩玩法？真係融入唔到。