根據英國自然學家達爾文（Charles Darwin）嘅講法，生物會不斷演化去適應生存環境，有助繁殖嘅特徵會留低，對為生存帶來劣勢嘅會淘汰。而近年人類女性而開始演變出「麻甩系女子」呢種物種，去提高適應呢個多樣而變化急速嘅社會。好多男性都視呢種女性係上帝賜畀佢哋嘅恩物，話拍拖、結婚最好搵呢種女仔，思想貼近先可以愛得長久。

咁其實咩係「麻甩系女子」？大體嚟講就係不拘小節、性格豪爽嘅女性，行為比較粗魯、成日爆粗咁，好獨立、個性突出，嗜好都係同男性差唔多，喺香港就鍾意食茶記多過食壽司、去高級餐廳咁。其實呢種女性係「男人婆」嘅變調，「男人婆」應該係一睇就知佢生活得好有男性特質，而「麻甩系女子」就望落同其他女性冇咩分別，但相處落就見真章咁。

香港係唔係真係咁多呢種「麻甩系女子」？的確係嘅，但同時亦好多「偽‧麻甩系女子」，佢哋會聲稱自己鍾意貼地生活，亦鍾意好多比較男性化嘅玩意，包括佢哋會話自己鍾意食豆腐火腩飯、飲啤酒、睇波同打機等等，而其實佢哋呢啲宣稱亦只係令男性覺得佢哋同自己相似，博取男性喜愛嘅伎倆，係一種自我宣傳嘅手法。

有個案例好值得大家探討嘅個案就係袁澧林，佢喺好多訪問中都話自己麻甩，但日前又同傳媒講佢屋企有成300支唇膏，如果真係不拘小節，到底會唔會屋企有咁多支唇膏？所以一直都有人話佢係假扮麻甩，更以此作定位，去博麻甩仔鍾意，而Super Girls成員陳穎欣（Yanny）、網紅Rose Ma等都被人質疑「麻甩系女子」身份。當然，我個人係相信袁澧林係真心鍾意食茶記、處事隨心率性嘅，但同真正嘅「麻甩」有一大段好大嘅距離。我都幾肯定咁講，喺影視娛樂圈裡面冇邊幾個女仔係「麻甩」，始終女藝人、女星嘅本質同「麻甩」呢個字詞係有衝突。

而其實大家對「麻甩系女子」嘅標榜亦變相係一種歧視，我哋讚頌呢種性格豪爽、處事獨立、甚至粗粗魯魯嘅女性，同時係代表住冇呢種特質嘅其他女性係次一等。唔通Girlish嘅女仔就唔可以獨立？一個擁有溫柔體貼、注重儀容等所謂女性特質嘅男性就及唔上麻甩仔？咁樣去概括睇一個人係對邊個嚟講都唔係公平，而且呢種諗法亦都係好直接引證咗呢個社會仍然係男權至上、男性較為優越嘅社會。