陳蕾入行9年努力變潮　曾經想放棄：大家都冇袋過一分錢

所謂離開是為了回來，陳蕾2009年參加第一屆《亞洲星光大道》奪得第四名，留在亞視5年後毅然離開， 同時因為工作證問題而返回家鄉廣州繼續音樂路，期間在內地參加歌唱比賽認識不同的音樂人，上年與樂隊Mr.的MJ和Tom自組公司，以全新形象，回歸香港樂壇，並推出新歌《Run Away》。

走型格路線嘅陳蕾唱功非常扎實，假音亦收放自如，推出的歌曲無論在音樂和編曲上都相當有驚喜，在香港樂壇嶄露頭角。陳蕾接受《香港01》訪問時，提到陳蕾推出的歌曲每一首都存在有血有肉的故事，問到在創作出自己獨特態度的音樂必須擁有什麼元素，她笑言：「喺我所有demo存貨入面，全部都係好正面嘅歌，歌詞就好似係自己寫畀自己嘅信。而風格上面，就係真實感。」

回想入行9年星途不算有突破，她直言當時在亞視需要參與不同類型的節目演出，雖然亞視提供了宿舍，但要四位藝員一齊住。陳蕾仍樂觀地表示福利已經算是不錯，但似乎所做的事跟初心背道而馳：「亞視都係一個好好嘅打工地方，又安排宿舍畀我住，但係喺一個舒服環境地下個人難免會有惰性，而自己最想做嘅就係音樂，所以都係因為依個原因離開。」選擇離開comfort zone當然會感到迷失，陳蕾指在迷失期中有將唱其他歌手的cover歌放上網，希望大家繼續聽到自己的聲音：「早兩年離開Amuse後，因為工作證同生活費嘅阻礙曾經有諗過放棄，好慶幸有依家嘅團隊，佢地相信我仲多過我相信自己，所以諗諗吓，既然大家都支持我，點解我要放棄自己呢？其實一開始公司大家都冇袋過一分錢，係到後期穩定啲先有基本生活費，好彩自己唔大洗，做吓手作幫補吓。你問我，我都係會揀開心嘅工作，都唔會揀高薪但唔係做自己鍾意嘅工作。」