最近填詞人林若寧跟前商台創作總監Mike Yuen創立了以「故事」為主題的手機應用程式，集合不同作家的作品，並以音樂、影片的全新方式去令大家重拾閱讀的樂趣。而流行愛情小說作家鄭梓靈新推出的愛情小說《大人的戀愛》，就找來視后唐詩詠拍攝短片。

短片中唐詩詠飾演一位33歲喺工作上又未得到滿足感，感情受挫嘅中女。一開始，由陳志雲聲演嘅老細就問到詩詠想唔想改變，然後詩詠就開始情緒大爆發，講到想喊但係又唔衰得，唔可以畀人見到自己軟弱嗰面，完全感受到生活只得返工，冇晒自己時間嗰種無奈，比起舊年《不懂撒嬌的女人》入面嘅凌禹勤頂唔順大鬧Mall姐嗰幕對比，演技更加成熟同更上一層樓，有過之而無不及。

其實諗諗吓，講啲嘢都幾啱，細個爸媽都會同你講努力讀書搵份好工咁就叫叻，但係大個咗之後又話做女人唔可以咁叻，男人唔鍾意女人太叻，適當時候就要扮蠢扮無知，學吓嗲人咁先得人鍾意，「真係架？典解嘅你好叻啊！」、「個袋好重，幫我拎啊」、「兔兔這麼可愛，你怎麼可以吃兔兔」，講疊字可愛啲？我又唔係冇手，點解我唔自己拎袋？然後過咗30歲就畀人話中女，一邊又話女人要獨立，一邊又叫你快啲搵個男人嫁，做女強人又話你冇人要，唔結婚又話你老姑婆，咁又點？根本冇人能夠討好全部人，所以對得住自己就足夠。