集英社要求《足球小將》改名《隊長小翼》 網民：譯名都要統一？
撰文：梁子健
出版：更新：
明明係《足球小將》，點解會係《隊長小翼》架？（網上截圖）
「攻呀攻，快搶攻！射呀射，射它吧！穿梭對手之間獨有腳法像玩耍。」相信動畫迷或者有返咁上下年紀的香港人，睇到上述一小段字就會立刻知道係張衛健唱的《足球小將》主題曲。不過，而家再叫呢套經典動漫做《足球小將》已經唔合時宜，甚至唔正確喇，事關據一個名為「粹日本」（IKIDANE NIPPON）的日本旅遊資訊Facebook專頁於4月22日的一個post所顯示，《足球小將》已是「舊稱」，而家應該叫《隊長小翼》。
對此，有網民立即喺該post留言，並質疑相關編輯未有做好資料搜集，就將《足球小將》的日本名（キャプテン翼）直譯為《隊長小翼》。但，「粹日本」有就質疑回應：「作品譯名按出版社集英社要求，現時香港譯名定為『隊長小翼』。」
經「粹日本」解釋，原來《隊長小翼》係官方要求。（網上截圖）
「粹日本」上述回應一出，立即有網民表示台灣譯名係「足球小將翼」、港澳都係「足球小將」，雖則中國大陸亦叫「足球小將」，但同時又會譯做「隊長小翼」，所以提出疑問：「係咪就連動漫譯名都要統一？」並有不少網民響應此問，紛紛表示擔心：「咁以後《男兒當入樽》係咪要改做《灌籃高手》？《高達》要叫《敢達》？《數碼暴龍》就變《數碼寶貝》？」
其實每一代人都有唔同嘅動漫回憶，就好似以前啲人叫《叮噹》，而家啲人叫《多啦A夢》，就算官方再改名，都總係有人會叫《叮噹》或者《多啦A夢》。
香港藝人與歷史人物撞樣 古巨基孫文似餅印 周柏豪周恩來係倒模
【PUBG】男玩家入食雞Group被老婆誤會嫖妓 網民：彭于晏幫到你
+1