【刑事偵緝檔案】臨時加10集1個月內起貨　蘇玉華點解被賜死？

無綫深宵時段重播的《刑事偵緝檔案II》播到第31集，講到周詠欣（張沅薇飾）怕gigi姐認出王志滔，而要開車撞死gigi姐滅口，而31集開始，更有新角色葉子晴（鄭秀文飾）的登場。當時劇集播出之後，更有不少家庭觀眾認為這個安排「好突兀」。原來這個劇情並非是出街大家睇到嘅版本。而直至現在《刑事偵緝檔案II》重播之後，更有網民討論。想當然，網民對於鄭秀文「接替」蘇玉華一事仍然不甚受落。

不過，這個安排的背後其實有段故。當時的《刑事偵緝檔案II》監製潘嘉德（德哥）接受《香港01》訪問時說：「嗰時原本一開始傾嘅時候劇本其實得20集，後尾就加到30集。開始正式拍嘅時候，就突然再加開到40集。」但是為甚麼會安排gigi姐（蘇玉華飾）撞車死再補上葉子晴（鄭秀文飾）呢？德哥：「因為最尾10集係播緊嗰陣臨時要加，真係諗返都一額汗！嗰時又咁啱蘇玉華要過檔去做女主角，所以我哋就搵咗鄭秀文過嚟。但係我哋又唔想拍話佢出國留學咁悶，咪安排容金枝（蘇玉華飾）死囉。」

【刑事偵緝檔案】蘇玉華突然被車死 監製話鄭秀文隨即加入有原因

【刑事偵緝檔案】蘇玉華要拍新劇 鍾麗淇加入劇組與梁榮忠撻著

雖然德哥就話「已經唔記得」當時蘇玉華要去趕拍哪一套電視劇，不過據電視劇上映日期推斷，就應該是要去拍1996年9月開播的《殭屍福星》。在訪問中，德哥更解釋了《刑事偵緝檔案II》增加至40集的原因。「嗰時因為要同友台打對台吖嘛，上面高層話要加集數嘅。嗰時得差唔多一個月時間去加多十集，連編、導、演、剪、配音全世界，真係日以繼夜㗎。公司內外通行無阻，直頭係全力支持！公司fully-support，仲真係要乜有乜添。」講真，臨時加開10集都冇問題，真是不得不佩服當時的台前幕後工作人員。借用一句網民的留言：「真係好癲」。至於當初點解要搵Sammi鄭秀文出演，又係另一個故事啦。

至於點解TVB要如臨大敵，臨時加長《刑偵II》？翻查當時電視節目表便知曉，《刑偵II》由1995年12月播至1996月2月初，同期亞視則安排重頭劇《我和春天有個約會》於1月13日晚上9時首播，陣容包括重金邀請過檔的鄧萃雯，還有商天娥、江華、萬綺雯等，難怪TVB決定要臨急臨忙決定以這套收視王者迎戰。