【聖誕極光傳說】TVB重本拍微劇場　周奕瑋首次擔正自爆拍到嘔！

每逢聖誕佳節，TVB都會推出特備節目同觀眾齊齊慶祝，好像去年的由鄭俊弘、何雁詩和譚嘉儀擔任主持《這個冬天不太冷》和《這個聖誕不怕冷》系列，都以旅遊節目形式遠赴極寒之地，為大家帶來不一樣的過聖誕節感受。而今年TVB就大搞新意思，找來日本通周奕瑋（Jarvis）和仙氣女神鄺潔楹（Judy）一同遠赴加拿大黃刀鎮，不再拍攝旅遊節目，而是拍攝TVB聖誕微劇場──《聖誕極光傳說》！

微劇場即短劇劇場，拍攝方式靈活多樣，每集約5-10分鐘，表現社會時事、人文風情，達到通俗、易懂，且給人以啟發的效果。而《聖誕極光傳說》講述男主角Chris（周奕瑋飾演）相信一個「聖誕極光傳說」：在平安夜、極光下、聖誕樹旁，把寶石送給心儀的人，彼此會得到幸福。他期待與女同事—女主角Aurora（鄺潔楹飾演）一齊看極光，達成宅男心願。在一次萬中無一的機會下，二人竟然一同到了黃刀鎮，並不斷踫上奇趣經歷，如遇到怪聲怪氣的老房東和惡形惡相的「黃刀鎮三人幫」等，幾經波折後在一個印弟安人村落重遇。Chris終於鼓氣勇氣，在極光下向女神表白，並送上那件珍貴信物…

雖然《聖誕極光傳說》一共10集，每集只有2分鐘，但製作一點也不馬虎！劇中所有場景都是在黃刀鎮實景拍攝，是充滿冬日聖誕氣氛的真實雪景。在十日九夜裡，攝製隊每日更冒著嚴寒天氣、追趕日光的限制下，緊密拍攝，盡善盡美。而兩位主角Jarvis與Judy除了要克服嚴寒的拍攝環境，劇中還有很多內心演繹，亦是對他們演技的一大考驗。

Jarvis接受《香港01》訪問時，就透露這次是他首次演戲：「今次係我第一次正正式式喺螢光幕前演戲，佢哋一開始搵我嘅時候，我心諗我從來都冇演過戲，點解咁大膽搵我嘅呢？我都有同導演講我真係冇做過戲，係咪OK？導演就話放心喇，你演到㗎啦！角色好似你，你做返自己。咁我就信佢，點知睇戲本原來我係個花痴宅男，雖然我現實唔係花痴，但角色的確有啲位似我嘅。（事前有冇惡補演技？）我冇上演技班，但真係有好老土咁對住塊鏡練表情。去到嗰邊，就真係越嚟越入角色，無論戲裡戲外都似一個天真爛漫嘅傻仔。」

在嚴寒下拍攝，真係是困難重重，Jarvis就透露自己真的拍到嘔：「我最記得係我凍到嘔，因為最低係負30幾度，Judy凍到冇晒表情，五官凍到僵晒，而我就唔算好怕凍，但就唔可以凍到隻耳仔，我記得有一場拍我哋喺出面砌雪人，拍完返入屋我開始見暈，而且想嘔，最後頂唔順入咗廁所真係攬住個馬桶嘔，但我冇將呢件事同人講，因為太瘀，有咩理由凍到嘔！但真心，我又唔想欺騙觀眾，真係嘔到天翻地覆！」雖然Jarvis中「寒」周身不舒服，但他就透露Judy相當體貼：「今次最幸福，有Judy煲湯俾我哋飲，雖然佢凍到死吓死吓，但都有去超級市場買粟米蘿蔔同豬骨煲湯俾大家飲，又煮咗幾味家常小菜，都真係好warm！」

問到TVB是否很「揼本」製作，Jarvis就笑稱：「我唔知實際上揼咗幾多本，但都飛咗7個工作人員過去，而我覺得最揼本係入面有好多場景，好似雪地有棵聖誕樹，我哋真係特登買棵聖誕樹，真係砌落去雪地上面，中間仲放部發電機，令啲燈飾着燈！而最最揼本係工作人員帶咗成千個暖包過去，因為Judy好怕凍，所以準備十足，好誇張！」

《聖誕極光傳說》每集只有2分鐘，何止觀眾唔夠喉，Jarvis更笑言未過足戲癮：「唔好話觀眾唔夠喉，我哋自己都唔夠喉！希望之後可以演耐啲，繼延續落去。而今次除咗拍咗《聖誕極光傳說》之外，我哋都拍咗個MV，而MV入面嘅角色我哋係完全相反，我就係當地一個型男導遊，而佢就係天真傻妹。有一場戲，我哋更加要喺聖誕樹下深情對望兼Kiss，到底有冇真係Kiss，就留返俾大家想像。」