上月尾剛30歲生日嘅劉溫馨，喺新劇《香港愛情故事》中，飾演石修第二任妻子，忘年戀話題十足。活動中更重演戲中親密坐大腿場面，劉溫馨接受《香港01》訪問時話：「戲中係我做主動嘅，修哥好紳士拍攝時教我好多嘢。」

「01最賞睇娛樂大獎」即日起至12月23日接受投票喇，答埋簡單問題，隨時贏最新5G手機12 Pro！

劉溫馨同石修真實年齡相差42歲，但佢就話唔會突兀：「戲中我仲有個讀小學嘅仔，第一次做人媽媽，仲做人後母，龔嘉欣係我繼女，但其實我哋年紀好相近。不過之後會交代我個角色經歷過好多嘢，心境比年齡成熟。」

至於現實生活中接唔接受忘年戀？劉溫馨就話：「年齡其實唔係最大考量，拜登都78歲先做總統啦，我自己都係感覺行先，唔會太理會對方年紀，以往嘅另一半年齡比較近。成熟啲諗嘢全面啲，更識得照顧對方感受，如果有feel都唔抗拒。」