姜濤在ViuTV節目《呂濤米Lo Seoul》自爆只剩3年合約，外界對他與MIRROR各成員的去向極度關注，姜濤、Anson Lo、Edan、Jeremy、Jer與Tiger今晚（30日）出席《第七屆KKBOX香港風雲榜》，完騷後，姜濤受訪時多次為此向隊友講唔好意思：「我都係隨口噏，冇諗過咁大風波，點解唔剪走佢？」又指未收過過檔邀請：「得ViuTV肯要我。」問到有沒有查證自己仍有多少年完約，姜濤再次解釋是隨口噏：「詳細仲有幾多年唔記得，無論仲有幾年都好，我哋MIRROR都會一齊度過我哋每一年，做好自己嘅嘢。」

早前在節目中都被問起拍拖話題，姜濤承認的確想拍拖：「要睇緣份先，依家呢個身份就算真係緣份到都未必高調，或者我可能鍾意到佢想公開呢！」一問起對戀愛對像，Edan就幫手擋：「我囉！」對於未來發展，Edan相信MIRROR存在，就會繼續有妹豬組，而今年小組亦會繼續出歌。

而對於「沒有戀愛感覺」，Edan沾沾自封為「撕漫男」：「我覺得我適合，大家打開漫畫見到我，就會撕爛漫畫！」然後自爆：「度咗好耐，終於有機會畀我發揮！」他又開解fans：「由初出道到依家所有嘢，係完全冇諗過。有依家嘅嘢都感恩，有我呢刻都係因為所有fans。明白fans想我更好，大家放心，我一定會更努力進步，會同花姐多多交流，佢一定會好好努力幫我，Love You花姐。」

Jeremy談到被花姐催拍拖，他直言已30歲，想拍拖但未遇上合適人選，「希望在明天，希望唔使等到40幾歲。」至於他毫不掩飾分享妒忌大表哥，他表示這是人生經歷的事，值得跟大家分享，Stanley也一如以往的大哥哥作風，大家都彼此感謝。談到合約年期，他表示，「沒有care合約問題，一直都好想做男團，當然越做越長就最好，而家自己都忙緊唔同工作，只係諗出道咗幾多年。」

對於合約問題，Jer答得十分輕鬆：「我仲以為昨日先出道，我心境仍好年輕。其實冇特別諗年份，每一次表演或做歌，都係諗點樣做好，無論幾多年都keep住咁樣做。」對於跟花姐deep talk，他表示非常歡迎，但姜濤Edan和Jeremy都一致指他會哭，Jer豪言：「男子漢大丈夫，流血不流淚。」至於花姐自爆對未能為他爭取樂壇獎項耿耿於懷，Jer就表示，「好多謝花姐一手一腳湊大我哋咁多個，我哋有今日都全靠佢，無論發生咩事，花姐都係我哋好多謝的人。」他坦言年輕時曾幻想獲男歌獎，「大個咗有乜諗獎項，做好每一首歌要表達的訊息。」