《第44屆香港電影金像獎》頒獎典禮今晚（4月19日）於香港文化中心舉行，已故音樂巨匠坂本龍一及Nata Connelly的《風林火山》奪得「最佳原創電影音樂」。麥浚龍上台代為領獎，並講出當年邀請坂本龍一先生為電影配樂時發生點滴。

麥浚龍代領獎

麥浚龍：「得到呢個獎感到好開心，同一時間亦好沉重嘅一個獎項。」接着，他提到當年致電坂本龍一先生時，坂本龍一身體已經出現不適：「當其時佢喺紐約，佢同我講，當其時佢身體唔好，已經travel唔到去一個咁遠嘅地方。」之後，麥浚龍到了日本東京見面。

憶坂本龍一為《風林火山》配樂連續彈6個鐘

「佢坐咗喺我面前連續咁樣彈咗6個鐘頭。我記得佢仲同我講咗一句說話：『如果個方向唔啱，你就立即煞停，我就會即刻轉另一個音樂風格。』我覺得我哋呢個project合作到，係因為佢對一個落雪嘅地方感到好大好大嘅興趣，但係喺佢晚年嘅時候，佢嘅身體已經唔可以去一啲極度寒冷嘅地方去睇拍攝，所以呢一個獎我代佢哋多謝大家。好似呢部電影對白一樣：『散聚有時』Thank you。」