愛美麗狂想曲︱李佳芯翻着31年前港姐旗袍　氣質媲美袁詠儀梁小冰

由陳豪、李佳芯擔正主演嘅無綫（TVB）劇集《愛美麗狂想曲》正於翡翠台熱播，劇中Ali角色好愛幻想，形象百變，第一集出場以旗袍現身，幻想自己奪得「第20屆香港小姐競選冠軍」，原來呢件旗袍有逾30年歷史，仲真係喺港姐決賽夜出現過！

第一集一開場，Ali穿着黑色旗袍晚裝，宣布獲得「第20屆香港小姐競選冠軍」冠軍時表現興奮，獲加冕戴上冠軍后冠後，更向鏡頭大派飛吻。有網友發現呢件黑底綴以紅金色刺繡嘅旗袍，正正係31年前袁詠儀喺1990年度港姐決賽奪冠當晚，獲加冕時嘅一套旗袍服裝。

每年港姐TVB都會製作一系列舞台服裝，不過估唔到服裝間可以巧手保存旗袍超過30年。細心睇其實Ali身上旗袍係左右都有繡花，應該唔係冠軍袁詠儀，而係當屆季軍梁小冰身上嘅一套先啱。雖然Ali並非選美出身，但網友一致大讚佢有樣有氣質，絕對係大家心目中冠軍。