周嘉洛去年因拍攝新劇《痞子殿下》而暫別《愛回家之開心速遞》，劇集拍畢後，他曾「閃現」現身熊若水婚禮，但之後由於要拍攝《四十二章經》，所以一直「回家」無期。呢日周嘉洛同江嘉敏為《四十二章經》喺土瓜灣開工，收工後，二人齊齊接受《香港01》訪問，周嘉洛表示新劇預計拍攝到本月底，但另一邊廂，佢暫時仲未收到《開心速遞》的召喚：「完咗我估可以返去，我對上一次拍《痞子》時都係拍到尾收到通知接《四十二章經》，所以我依家都係等緊消息。我自己本身好隨緣，咩都得，返去又開心唔返去都開心。」

江嘉敏在旁笑言自己都仲未收到下一套劇的安排，並安慰周嘉洛此乃正常操作，不過此舉反而令周嘉洛開始不淡定，最後仲搞笑表示：「我諗我要打去問問監製先得。」江嘉敏聞言後，即表示有興趣入組《開心速遞》，她表示因為今次拍攝而與鄺潔楹變得熟絡，故希望二人可在《開心速遞》交手，之後更叫周嘉洛分享劇集監製祥哥的聯絡號碼：「我可以sell返橋比佢，我真係好有興趣入《愛回家》，唔知祥哥可唔可以寫少少故事比我同Judy發展，雖然同周嘉洛都可以，但因為佢本身有條線嘛，所以唔好打擾佢。」