東張西望｜黃生控訴家人禁錮生母 反被指不孝貪錢迫阿媽拍片4宗罪
《東張西望》昨晚的老人院爭產案迴響甚大，移居德國的黃生，回港向《東張西望》控訴親家姐與親哥哥刻意禁錮生母，阻礙二人見面！但家姐反現身《東張》，與黃生阿哥聯合舉證指出黃生不孝、借錢唔還、迫阿媽拍片兼攞錢等，阿哥甚至展示一張有黃生簽名同身份證的「自願放棄產業證明書」，但黃生就話自己係飲醉酒被「裝」，究竟真相係點？
《東張西望》今晚播出「老人院爭產案」下集，先來個上回提要，黃媽媽的細仔黃生，與阿哥家姐互相指罵。移居德國大半世的黃生，回港後因探親不果而向《東張》指控阿哥家姐禁錮生母，指年邁的母親早前回港就醫，他初期仍能與母親相見，後來生母轉到老人院後就被下旨唔准探，他懷疑有人從中作梗，旨在謀住母親身家，包括2萬歐元、70萬人民幣、40萬港元，以及在內地的兩幢物業。
據黃媽媽早年立的遺囑所指，內地兩幢物業，一幢比家姐，另一幢則兩兄弟一人一半，黃生控訴阿哥擅自刪除其業權，想令佢冇得分。
《東張西望》女主持吳幸美陪黃生去老人院，欲探黃媽媽及在醫生、律師見證下重新立遺囑，最終雖然不成功，但幸美卻在老人院樓下遇到剛準備離去的家姐，她否認禁錮生母，在訪問中指出黃生多個罪狀，跟黃生完全是另一版本。
首先，家姐指母親出事時，自己曾向黃生求助，對方冷眼旁觀、毫無反應，「阿媽瞓咗一個月，唔郁得，屙屎屙尿都要瞓喺床處理，我一返到深圳即刻帶阿媽返香港，佢話阿媽吽下就會好，唔好出去。我自己帶阿媽返香港，足足喺屯門醫院等咗10個鐘先上急症室，好淒涼！我想佢幫下手，佢唔肯都算，阿媽入院幾日佢都唔肯探，到佢肯探就問阿媽攞錢！」
家姐說自己月花百萬安排阿媽住老人院，寧願唔食飯都要阿媽住好一點，但細佬就冇孝心，「佢話家姐多餘嘅，抌佢喺屯門醫院，冇人認領，政府自然有人執。我話你咁嘅說話都講得出，以後唔好嚟探阿媽！」
她指黃生開餐館時借過自己13萬馬克唔還，又曾登報脫離母子、姐弟關係。黃生哥哥亦提供當日黃生登報的證明，指黃生在德國打工同人打架被辭退後，阿媽家姐都不幫親，更叫他不要失禮，懷疑黃生因而憤憤不平，決定登報。
此外，講到黃生自稱「被消失」的50%福田物業業權，哥哥亮出一張有他本人簽名和身份證副本的「自願放棄產業證明書」，阿哥指間屋由自己出錢興建，父親過世後，弟弟已收租多年。阿哥稱自己早已同阿媽講數，母親過世後將收回物業，並說：「佢食咗我30年租金，仲要成座樓吞埋？」「呢張文件邊個簽？大人大者冇可能逼你簽啩？」
針對以上指控，黃生有以下反駁，他指登報啟事非由自己刊登，但不清楚是誰人刊登，更表示自己後來有登報澄清冇脫離關係，並聲明之前所刊登的啟事無效。主持問到有冇留底，黃生就話冇，他解釋：「我唔似啲人有心人裝無心人，剪低晒留十幾廿年，第日搵機會攞嚟做咩證物。」
他亦表示自己冇簽「自願放棄產業證明書」，指自己是飲醉酒被人「裝」，曾質問過阿哥為何有這張紙，對方跟他說：「玩下啫！玩下啫！」黃生指自己多番叮囑對方將那張紙丟掉，更謂證明書對自己毫無好處，若是清醒情況豈會簽名放棄業權。
黃生曾向《東張》展示一段黃媽媽在病床錄的影片，黃媽媽說：「冇錢，係咪家姐攞走咗？耳環都冇，戒指都攞埋。」家姐就為自己平反說，母親是在被黃生引導和教唆下拍攝，自己當日確實有為黃媽媽脫下耳環和戒指，但原因是要在醫院檢查和掃瞄。到底事件誰是誰非？結局是Open Ending，而涉事的黃生、阿哥現時亦已離開香港。