古佩玲（Kelly)今日（24/10）現身電視城出席無綫處境喜劇《愛．回家之開心速遞》之宣傳造勢活動。提到被傳與飾演「風少」的陳浚霆戲假情真，經常不避嫌疑在片場人前人後態度親暱。二人有次在出席公開活動接受訪問時，被網民意外拍到在背後手拖手，完全零避忌。

Kelly接受《香港01》訪問時表示：「其實嗰次我哋係光明正大咁拖住手，因為嗰陣時係畀對方能量。過往我哋一齊拍嘢嘅時候，我哋都會為對方加油，例如我返工嘅時候好攰，佢就會拍吓我，叫我精神。可能我同佢都係喺外國返嚟，加上我哋又有養狗仔，變咗比較投契。（對佢有冇愛意？）我係對風少係有愛意嘅。（對現實嘅佢有冇？）咁呢啲就要睇之後再講。（佢有冇同你表白過？）咁又冇，因為我哋只係朋友嚟。（將來有冇機會發展？）咁我哋一陣要搵風少問吓。（覺得陳浚霆為人點？）我覺得佢好識照顧人，好似大哥哥咁。」