【賭城群英會】賭局勁兒戲　阿叻狂轉牌以為玩緊指尖陀螺　

無綫劇《賭城群英會》播映期一波三折，更險些淪為倉底劇，而王晶這齣作品在本週終於出爐，出來口碑又不是太差…，若果當作笑片來看，又或者愛懷舊的觀眾，見到闊別多時的劉兆銘、余慕蓮、郭峰等老戲骨，也會有一份親切感。但這齣劇集始終是一齣賭劇，大家當然更關心有關賭的場面，但至今為止只是看到陳百祥(阿叻)chok住轉啤牌，仿如玩緊指尖陀螺，而且加入的CG畫面，給人感覺是「好假」。

阿叻的是旦哥角色，原先屬意歐陽震華，Bobby曾拍攝《賭場風雲》，當時更獲得35屆的艾美獎提名，演技無容置疑，但角色換上阿叻就當堂出事，劇中的賽馬情節仿如為阿叻度身訂造，講他隨口噏都貼中頭馬，已經顯得十分突兀，亦無助劇情進展。但最難頂是他有意無意展示的牌技，想學賭神偏偏又扮得不像，以CG效果將手中牌面變來變去，而在第一集他就將啤牌垂直在指尖旋轉，再次令好假的CG效果表露無遺，只能說句何必呢？

老實講阿叻的後生版是靚仔張景淳，已經令人嘩一聲，咁都算，或者人老了會走樣，但他經常chok樣就相當惡頂，在第3集阿叻又玩轉啤牌，今次是橫向旋轉，為了突顯厲害，背景還配上「蓬蓬聲」，但他只是純粹跟三個徒弟馬國明、黃浩然及何浩文傾偈，為何無端要轉牌呢？當然又是不解釋，而且他轉牌的動作，更似足早前掀起熱潮的指尖陀螺，感覺除了搞笑，跟個型字完全沾不上邊。

至於世紀之戰，向無名(謝賢飾)戰勝賭魔屠城(劉兆銘飾)，大家都好期待他們的精湛賭術，但竟然像趕收工，只是兩三下已經玩完，ming sir七情上面，肉緊大嗌「你出千」，但如何出千，如何換走隻牌，竟然提都無提過，反而用了不少時間搞爛gag，像四哥好有氣勢出場，然後話「呢條友打佢殘忍，唔打佢又難忍」，又寸ming sir飾演的賭魔「打麻將又摩，玩啤牌又摩嘅屠城」，然後又捉住ming sir兒子及孫仔，迫對方自殺，成個世紀賭局只能說相當兒戲，浪費了四哥及ming sir兩位好演員囉。