【日本環球影城】最新 Night Parade 速龍暴走超真實體驗

USJ 日本環球影城每季節目多鑼鑼，繼有各位女士最愛的美少女戰士之後，5 月 17 日起推出最新節目「環球奇觀晚間巡遊 ~Best Of Hollywood~」，在樂園漆黑的環境下，體驗四大荷里活電影主題巡遊。有邊四位主角呢？《侏羅紀世界》、《哈利波特》、《迷你兵團》，仲有動漫迷最愛嘅《變形金剛》。巡遊在 7:30 pm 開始，現場見到好多觀眾 1 小時前已霸定靚位。另外牆身會使用光雕投影，電影現場感十足，記得走到建築物旁邊企定欣賞。
攝影：龔嘉盛、陳詩雅

光雕投影全長 600 米

日本環球影城過去的巡遊用上光雕投影技術雖不是新鮮事，但有成 600 米長牆壁投影就包保每一位在場觀眾都睇到，現場感十足。除了看街道上的花車主角外，不要忘記抬高頭望牆壁的投影 show，小記 ( 偏心 )喜愛 Minion，當一堆迷你兵團在巡遊出場時，同時奏起 YMCA 音樂加上投影畫面，感覺現場變身黃色嘉年華。

釋放速龍到處走！

2015 年上演的電影《侏儸紀世界》緊張刺激，主角當然少不了兇猛暴龍！然而巡遊中最 surprise 小記的是第三節出場的速龍跳車！本以為巡遊車上的速龍會乖乖留在車上，點知真係會打開閘門跳落地，仲會在觀眾面前走來走去！由於速龍比例真係 1 : 1  ( 當然唔知真正速龍身高多少，眼見比成年人高！ ) 感覺速龍真係埋身，好真實！不過咁，最搶眼嘅暴龍就因為件頭太大，只可以在車上嘶叫嚇嚇觀眾，期待暴龍有一天可以在巡遊中到處走。

暴龍唔識走來走去，但速龍就......

哈利波特魁地奇球賽大鬥法

日本環球影城又點少得《哈利波特》，巡遊一開始就由霍格華茲學生推著手推車出場，隨後是霍格華茲特快列車，列車窗口是哈利波特不同人物的影像，畫面迫真。緊隨就是魁地奇球賽，花車上有學生騎飛天掃把大鬥法，令現場如置身球賽當中，當催狂魔出現時更是狂風閃電，霍格華茲學生用魔杖施法對抗效果逼真，「哈利」迷一定超興奮。

霸氣 8 米高《變形金剛》

哈利波特出場後，緊接其後到《變形金剛》登場，車上有博派「大黃蜂」表演變形，然後當然有對手狂派「麥加登」，一出場即剷平高樓大廈，又同街上的 dancer 軍隊駁火。身高達 8 米博派隊長柯柏文當然係最後出場的英雄，與牆壁上出現且破壞力驚人的鑽洞獸決鬥，最後拯救了大家。光雕投射上效果細緻，仲可以同柯柏文充份互動，好精彩。

Ｍinions 開狂歡  Party

The last but not least！最後一節是 Minions 森巴嘉年華來個 happy ending！成班迷你兵團包括 Bob、Kevin、Stuart 幾位重要人物唔少得，而《壞蛋掌門人》犀利哥都會一齊出現，Minions 跳舞大唱 YMCA，巡遊就在Bello聲中完結。

日本環球影城

地址︰大阪市此花區櫻島 2-1-33

交通：從 JR 夢咲線 ( 櫻島線 ) 到環球影城站下車步行約 5 分鐘到達

官網門票︰一日周遊券 成人 7,900 日圓 (約港幣 $569)，小童 5,400 日圓  (約港幣 $389)

鳴謝：KKday

部份映像提供：日本環球影城