不少高級餐廳都會訂立「最低消費」制度，自我保障以防客人「齋坐唔食」。有自稱是餐廳經理的網民今日發文抱怨無理顧客，稱早前曾有一名女士打電話訂位，卻不肯支付10人包房最低消費的1萬元。樓主見狀遂降低收費至8000元，惟該女士仍堅持要求免除最低消費，更指「你嗰晚都無人訂房啦」。最終樓主「企硬」不讓步下，對方竟憤稱會投訴樓主「倒米」，令樓主大感無奈，直言「你想有比較好嘅環境食飯，相對就要付出比較多嘅金錢」，引起網民熱議。

下載「香港01」App ，即睇城中熱話：https://hk01.app.link/l7U1Y7t5LO

一位自稱是「港島區某高級中餐廳」經理的網民，今日（13日）發文抱怨無理顧客。他指有次帶位姐姐收到一通訂位電話，對方「想坐包房但嫌低消（最低消費）太貴」，更指自己認識餐廳經理，希望可藉此獲得優待。

樓主了解後便致電給該女士，表示可提供「特別待遇」，將本來10人房最低消費的1萬元降低至8000元。惟對方卻稱10人中只得6位成人，其餘4位皆是小孩，「點食到8000蚊啊」。樓主只好表示「低過8000嘅真係做唔到」，並建議對方「考慮坐返大廳」。

對方見狀便開始「發爛渣」，指自己想坐圓枱而非方枱，反問樓主若只有包房才有圓枱，「點解唔畀間房我」，又要求免除最低消費，直指「你嗰晚都無人訂房啦」。樓主拒絕要求，建議可「嗌酒飲或買酒拎返屋企」，費用可一併計算落最低消費。

該女士遂反問樓主是否「無論如何都要收我8000低消」，又威脅稱「如果我話我唔嚟咁你點」。樓主「企硬」唔讓步下，對方竟發惡指樓主「情願唔做我呢單生意都要收我低消」。即使樓主已表示是「公司規矩」，該女士仍批評他處事缺乏彈性，「吓吓咁死古古唔得㗎」，又指自己會作出投訴，「會同你老闆講你呢個員工幫你倒緊米」，叫樓主「執定包伏」後便掛斷電話。

樓主大感無奈，直指餐廳人均消費由800至1000元不等，若對方只得6位成人，消費可能不足3000元，「又要揾兩個伙記serve你，又要燈油火蠟」，隨時入不敷支，大呻「個個好似你咁我啲房晚晚爆啦，一間房做兩三千，間餐廳應該半年內會執」。

樓主認為「想有比較好嘅環境食飯，相對就要付出比較多嘅金錢」，指出包房食飯好處多，反問「有邊個唔鍾意」，惟每項服務都需用錢交換，直言「你唔想畀低消咪坐大廳囉，無任歡迎」。

樓主最後指「間房喺佢收線後2分鐘就畀人訂咗，低消1萬」，認為合理情況下「餐廳有時真係要企硬，唔好畀啲客搲到」。帖文旋即引起網民熱議，不少人都留言大鬧訂位者，認為高級餐廳有最低消費相當正常，狠批她「無錢仲想包場」想法離譜，而且「發爛渣」時態度惡劣，諷刺她「以為自己係邊個」。

（fb群組「西客之道 HIspitality Secret」）