《2017年度勁歌金曲頒獎典禮》昨晚結束，李克勤奪4獎成大贏家，今年轉會星夢的周柏豪得「最高人氣歌星獎」，因《降魔的》石敢當爆紅的胡鴻鈞奪得「最佳演繹男歌星」，及兩首金曲《朋友身份》和《到此一遊》，同樣是豐收之年。

「石敢當」胡鴻鈞在《勁歌》大豐收，他自言感覺受寵若驚：「其實真係有啲受寵若驚㗎！獎項當係好大鼓勵，但更豐收嘅係音樂上有新嘗試，亦感恩係歌曲同戲劇上都有好多人俾機會我；而且當我質疑自己嘅時候係佢哋俾番信心我。雖然今年劇集嘅角色大家都好喜愛，但好多謝大家仲記得我係一個歌手。」

得獎固然開心，但「最佳演繹男歌手」這個名銜會否反而成為壓力？胡鴻鈞表示：「我覺得唔會嘅，反而係一個動力令我進步，因為『最佳演繹』對表無論喺錄音室定現場都做到水準，咁樣係推動到我自己進步。」另外，獲前輩李克勤台上「點燈」下年有機會得「最受歡迎男歌手」，他謙虛表示：「能夠喺佢隔籬見證佢得獎已經係榮幸，多謝佢嘅鼓勵！」

台上胡鴻鈞提到《朋友身份》一曲輾轉才到自己手，哪原本曲落誰家？他表示：「其實原本係許廷鏗㗎，我好相信每隻歌都有歌命嘅。之前一路樂壇都有好多歌，經歷唔同歌手先去到最後真係唱嘅人。」從好友手中得到這首歌，胡鴻鈞覺得別具意義：「我覺得係特別有意義嘅，因為同Alfred有關係，當時佢讓咗隻歌俾我唱，我就覺得有個責任要更加唱好首歌，因為首歌係代表緊佢。」當許廷鏗聽到最後成品有何反應？胡鴻鈞話：「佢都好戥我開心，都覺得我唱得幾好，希望大家都可以繼續音樂嘅夢想！」他又表示將來有機會可能開Live或拍片合唱這首對他們甚有緣份的歌曲。