一提王喜，除了你會想起陳志雲﹑寫真集﹑《烈火雄心》之外，又會唔會記起他曾經是歌手？其實王喜做演員出色之外，2001年轉戰樂壇推出專輯《喜新唱歌》成績不俗，達到金唱片銷量添！不過02年出多兩張專輯後就退出樂壇，幸好仍然Keep住酒吧夜場登台，所以養兵15年，又遇到「第二春」，仲計劃今年聖誕出新歌！他表示：「今次再出歌，當然希望有人聽，希望神州大地個個都識呢首歌，我唔怕做洗腦歌，因為好難得！」

話說王喜日前到內地參加了《亞洲音樂節》，今次的演出場地在郵輪上，他分別唱了F.I.R《我們的愛》和鄭智化的《水手》，因為《水手》受內地歡迎，結果變成全晚最高興的歌曲，更吸引內地唱片公司垂青，找他傾合作大計。王喜坦言：「內地公司真係有搵我傾，仲問我有冇唱片公司，又叫我Send返以往廣東歌作品畀佢地Reference。」他又透露，因為主攻內地，所以會出國語歌，但沒有計劃出實體碟，會集中在網絡打歌。他又謂：「唔好拘泥於唱片呢樣嘢，只是載體而已。」非常豁達！

今次在船上的表演，成功換得一份歌手合約，令他非常驚喜。

雖然他希望首新歌可以傳遍「神州大地」，不過他都有原則的，就是「希望呢隻歌唔係低俗嘅歌，而係可以激勵人心！」咁即係什麼題材？不會關於愛情，而是朝《水手》這首歌的方向，「因為內地很多人都離開家園打工，很多人都獨自生活，因此需要振奮人心的作品。」

其實當年他推出三張專輯，成績真係唔錯，今日他在面書宣布自己會再做歌手時，資深電台DJ林柏希馬上留言，直指《仍是這首歌》他經常都會播放。但既然有些成績，王喜又何以突然離開樂壇呢？他憶述：「當時經歷過做歌手要面對的事，要去做Show做Event，又有保姆有化妝，但唱完返TVB又做返演員做《烈火雄心》，現實中得到的待遇和身份好唔協調。」究竟咩意思？即是拍劇時可以與娛樂記者談笑風生打成一片，但做歌手時，「唱片公司教你點答，我好難面對同一班記者，但唔同性格！」不過，最直接的原因，當然就是02年起唱片業一蹶不振，令他的唱片公司有調動了。「所以都係隨緣就算數，好難適應呢個雙重身份，轉頭要我變高貴做歌手，好似好核突。」

雖然過左咁多年，但呢首《仍是這首歌》真係幾洗腦。

儘管他經常登台，對唱歌充滿信心，但做歌原來都一樣有難度，因為他最驚到錄音室錄音。「我係典型獅子座，冇辦法重覆錄咁多次音，好多音樂人只係靠感覺判斷，又講唔出佢點樣先收課。」星座的問題，希望唔會阻礙倒王喜出新歌啦！